Salmos 55 - Chol: I T’an Dios

La' jisʌnticob jini jontolo' bʌ

¹ Dios, ubibeñon coración. Mach a ñusan chuqui wolij c'ajtibeñet.

² Ñich'tañon, jac'beñon. Cabʌl mu' ti t'an c pusic'al, ch'ijiyemon.

³ Jini j contrajob mi' cha'leñob t'an tij contra. Yomob i tsʌnsañon. Mi' bʌc'tesañoñob. Mi' lajob i t'an cha'an mi' tsʌnsañon ti' mich'ajel.

⁴ Wen ch'ijiyem c pusic'al. Woliyon ti bʌq'uen ame chʌmicon.

⁵ Tsiltsilñayon cha'an bʌq'uen. Mi' toj sajtel c pusic'al.

⁶ Tsa cʌlʌ uts'at anic c cha'an i wich' x'ujcuts Cha'an mic wejlel majlel ba' mij c'aj co.

⁷ Anic c wich' tsa' puts'iyon majlel ti ñajtʌl, Tsa' chumleyon ti jochol bʌ lum.

⁸ Tsac bʌc' sajca xuc'ul bʌ cajñib Ba' mach i tajayonic jini bʌbʌq'uen bʌ ic'.

⁹ Jisañob, c Yum. Socbeñob i t'an jini winicob cha'an mach mʌjlic i cha'añob. Come q'uelel c cha'an jini jontolil yic'ot jini leto am bʌ ti tejclum.

¹⁰ Ti q'uiñil yic'ot ti ac'ʌlel mi' xʌñob ñumel i ts'ajquil tac tejclum am bʌ ti' joytilel. An mulil yic'ot wocol ya' ti' yojlil tejclum.

¹¹ Wen jontolob ya' ti' yojlil tejclum. Belel ora an tic'laya yic'ot lot ti choñoñibʌl.

¹² Come mach j contrajic jini tsa' bʌ i yʌ'leyon. Tsa'ic i pʌsʌ i bʌ tij contra, tsa' mejli j cuch. Jini tsa' bʌ tejchi i contrajiñon ma'anic tsi' wʌn ts'a'leyon. Tsa'ic i ts'a'leyon, tsa' mejliyon ti puts'el.

¹³ Jatet j cʌñʌ bʌ tsa' wʌ'leyon. Laj bʌ winiconla. C pi'ʌlet ti xʌmbal, wen cʌmbilet c cha'an.

¹⁴ Cabʌl tsa' lac pejca lac bʌ ti uts'at. Cabʌl tsa' tem ochiyonla ti' yotot Dios.

¹⁵ La' jilicob ti ora. La' chʌmicob, Come an i jontolil ti' yotot yic'ot ti' pusic'al.

¹⁶ Pero joñon mi caj c chʌn pejcan Dios. Lac Yum mi caj i coltañon.

¹⁷ Che' ti ic'ajel yic'ot ti sʌc'ajel yic'ot ti xinq'uinil Mi caj c suben c wocol. Mi caj i yubibeñon c t'an.

¹⁸ Mi caj i pʌyon loq'uel ti' p'ʌtʌlel j contrajob. Mi caj i ñʌjch'el c pusic'al come mach i tajayoñobix. Come cabʌlob mu' bʌ i contrajiñon.

¹⁹ Dios mi caj i yubiñon. An i yumʌntel c'ʌlʌl ti wajali c'ʌlʌl ti pejtelel ora. Mi caj i ju'sʌbeñob i pusic'al jini jontolo' bʌ, come ma'anic mi' cʌyob i mul. Ma'anic mi' bʌc'ñañob Dios.

²⁰ Jini j cʌñʌ bʌ tsi' choñoyon che' ma'anic c mul ti' tojlel. Tsi' jeme i t'an tsa' bʌ i subeyon.

²¹ Tsi' pejcayon ti uts'at, Pero an guerra ti' pusic'al. Ñumen bojy i t'an yilal bajche' aceite. Wen jay i yej yilal bajche' espada.

²² Aq'uen a cuch lac Yum. Jini mi caj i cuchbeñet majlel. Ma'anic mi' junyajlel cʌy jini toj bʌ ti' bajñelil.

²³ Dios mi caj i chocob jubel ti tam bʌ ch'en ba' mach chʌn loq'uicob. Ma'anic mi caj i ts'ʌctiyel i jabilel jini stsʌnsajob yic'ot xlotiyajob. Pero joñon mic xuc'chocon c pusic'al ti Dios.