Salmos 51 - Chol: I T’an Dios

Mi' c'ajtiben Dios i ñusʌntel i mul

¹ Dios, p'untañon cha'an cabʌl i yutslel a pusic'al. Tsac ñusʌbeyet a mandar. Yʌpbeñon c mul, come wen a wujil p'untaya.

² Lu' pocbeñon loq'uel c jontolil. Sʌq'uesʌbeñon c pusic'al cha'an tsac cha'le mulil.

³ Cujil tsac ñusʌbeyet a mandar. Mic ña'tan c mul ti pejtelel ora.

⁴ Tsaj contrajiyet che' bʌ tsac cha'le jontolil ti a wut. Che' jini tsa cʌc'ʌ ti tsictiyel tojʌch a t'an, Sʌcʌch a meloñel.

⁵ Awilan, xmulilon tsa quila pañimil. Añʌch c mul c'ʌlʌl che' cʌntʌbilon i cha'an c ña'.

⁶ A wom a taj chuqui tac isujm ti' pusic'al winic, Jini cha'an aq'ueñon c wen ch'ʌmben isujm chuqui a wom.

⁷ Sʌq'uesañon yic'ot i ch'ich'el alʌc'ʌl Cha'an wen sʌc mi cajñel. Pocoyon cha'an ñumen sʌc mi cajñel bajche' sʌsʌc bʌ tocal.

⁸ Tsa' c'ʌsbeyon c bʌquel yubil. La' lajmicon cha'an mi cubin i tijicñʌyel c pusic'al.

⁹ Mʌyʌ a wut cha'an ma'anic ma' chʌn q'uelbeñon c mul. Yʌpbeñon pejtel c jontolil.

¹⁰ Dios, cha' melbeñon c pusic'al ti sʌc. Cha' mele quespíritu ti tsijib yic'ot ti toj.

¹¹ Mach a chocon loq'uel ti a tojlel. Mach ma' chilbeñon loq'uel jini Ch'ujul bʌ a wEspíritu.

¹² Cha' aq'ueñon cubin tijicña cha'an j coltʌntel. Aq'ueñon c wersa cha'an mic mel chuqui toj ti jump'ejl c pusic'al.

¹³ Che' jini mi caj c pʌsbeñob a bijlel jini mu' bʌ i ñusʌbeñet a mandar. Jini xmulilob mi caj i sutq'uiñob i bʌ ba' añet.

¹⁴ Dios, ñusʌbeñon c mul come tsac cha'le tsʌnsa. Dios, caj Coltaya, mi caj c'ʌyibeñet a tojel.

¹⁵ C Yum, jambeñon quej Cha'an mic sub a ñuclel.

¹⁶ Ma'anic ma' mulan tsʌnsʌbil bʌ a majtan. Muq'uic cʌq'ueñet pulbil bʌ a majtan, mach tijicñayetic.

¹⁷ Jini mu' bʌ a mulan jiñʌch ju'sʌbilix bʌ c pusic'al lojon, I wenta tsʌnsʌbil bʌ a majtan. Dios, ma'anic ma' ts'a'len jini ju'sʌbilix bʌ i pusic'al mu' bʌ i cʌy i mul.

¹⁸ Pʌsbeñob i yutslel a pusic'al a cha'año' bʌ. Cha' mele i ts'ajquil tac Jerusalén.

¹⁹ Che' jini tijicña mi caj a q'uel tsʌnsʌbil bʌ a majtan che' tojʌch c pusic'al lojon. Tijicña mi caj a q'uel a majtan yic'ot pulbil bʌ a majtan ti juncojtlel. Che' jini mi caj a wʌq'uentel alʌ tat wacax ti a pulʌntib.