Salmos 5 - Chol: I T’an Dios

Mi' wocol c'ajtin i cʌntʌntel

¹ C Yum, ñich'tʌbeñon c t'an. Ubibeñon c t'an cha'an woliyon ti wocol.

² Awocolic ubibeñon che' mij c'ajtibeñet, c Rey, c Dios, Come wolic pejcañet ti oración.

³ C Yum, che' ti sʌc'ajel mi caj a wubibeñon c t'an. Mi caj c pejcañet ti oración. Mi caj c letsan c wut ba' añet ti panchan.

⁴ Come Diosetʌch, ma'anic ma' mulan jontolil. Jini jontolil mach mejlic ti ochel ba' añet.

⁵ Mach pʌybilic ti a tojlel jini mu' bʌ i chañ'esan i bʌ. Ma' ts'a'len xjontolilob.

⁶ Ma' jisan jini mu' bʌ i cha'leñob lot. C Yum, ts'a' ma' q'uel jini mu' bʌ i cha'len tsʌnsa yic'ot jini mu' bʌ i cha'len lot.

⁷ Jixcu joñon, mi caj cochel ti a wotot come cabʌl ma' p'untañon. Mic bʌc'ñañet che' mic ch'ujutesañet ti jini ch'ujul bʌ a Templo.

⁸ C Yum, pʌsbeñon bajche' yom mi cajñel ti' tojlel j contrajob come toj a pusic'al. Toj'esañon ti jini toj bʌ a bijlel.

⁹ Mach isujmic i t'an jini j contrajob. Yujilob jisaya. Wen tuw i t'an. Mi' pejcañoñob cha'an mi' chucon.

¹⁰ Dios, yom ma' wʌq'ueñob i toj i mul. La' yajlicob cha'an tsi' temeyob i t'an tij contra. Chocoyob loq'uel cha'an cabʌl i jontolil, come tsi' ñusayetob.

¹¹ La' i tajob i tijicñʌyel i pusic'al pejtel jini mu' bʌ i ñopetob. La' i cha'leñob c'ay ti pejtelel ora cha'an i tijicñʌyel i pusic'al, come jatet ma' cʌntañob. La' i tajob i tijicñʌyel ti jatet jini c'ux bʌ mi' yubiñob a c'aba'.

¹² Come jatet mi caj a wʌq'uen i yutslel a t'an jini toj bʌ. C Yum, mi caj a joy mʌctan ti' yutslel a pusic'al i wenta mʌctʌjibʌl.