Salmos 49 - Chol: I T’an Dios

Tonto jini mu' bʌ i yʌc' i pusic'al ti' chubʌ'añʌl

¹ Winicob x'ixicob, ubinla iliyi ti pejteletla. Pejtel xchumtʌlob ti pañimil, ñich'tanla.

² Jini che' jach bʌ añob yic'ot jini ñuco' bʌ, Jini wen chumulo' bʌ yic'ot jini p'ump'uño' bʌ, ñich'tanla.

³ Añʌch c ña'tʌbal, jini cha'an mic sub. Mi cʌc' ti tsictiyel jini woli bʌ c ña'tan tic pusic'al come tsa'ix c ch'ʌmbe isujm.

⁴ Mi caj c sub ti lajiya jini woli bʌ c ña'tan. Mi caj j c'ʌn música am bʌ i ch'ajñal cha'an mic tsictesan.

⁵ ¿Chucoch mic cha'len bʌq'uen che' ti' yorajlel wocol Che' joyolon ti xjontolilob woli bʌ i contrajiñon?

⁶ Winicob mi' lon ña'tañob an i coltʌntel cha'an i chubʌ'an. Mi' chañ'esañob i bʌ cha'an cabʌl i chubʌ'an.

⁷ Ma'anic majch mi mejlel i tojben i mul i pi'ʌl cha'an mi' loq'uel ti' p'ʌtʌlel mulil. Mach mejlic i yʌq'uen Dios i tojol i mul,

⁸ Come wen letsem i tojol i cuxtʌlel. Mach mejlic i toj ti pejtelel ora,

⁹ Cha'an mi' taj i cuxtilel mach bʌ anic mi' jilel, Cha'an ma'anic mi' yoc'mʌl ti mucoñibʌl.

¹⁰ Che' jach mi' yujtel. Mi' chʌmel jini am bʌ i ña'tʌbal. Mi' jilel jini tonto bʌ yic'ot jini jontol bʌ. Mi' cʌyob i chubʌ'an, mi' ch'ʌmob yaño' bʌ.

¹¹ Mi' lon ña'tañob ti' pusic'al mi caj i yajñelob ti pejtelel ora, Mi' lon ña'tañob mach jilic i yotot tac ba' chumul i p'olbal. Mi' yotsbʌbeñob i c'aba' jini lum lajal bajche' i c'aba'.

¹² Ma'anic majch mi' chʌn ajñel ti pañimil anquese c'uxbibil. Lajal mi' jilel bajche' jini bʌte'el.

¹³ I tilel che'ʌch mi' lon ña'tañob pero tontojob. Jini mu' bʌ i tsajcañob, che'ʌch mi' lon ña'tañob ja'el.

¹⁴ Lajalobʌch bajche' tiñʌme' mu' bʌ i pʌjyelob majlel ti chʌmel. Lajal mi' majlelob ti chʌmel. Mi caj i yumañob jini tojo' bʌ che' ti sʌc'ajel. Mux i jilelob i bʌc'tal, mux i yajñelob ba'an chʌmeño' bʌ.

¹⁵ Mach che'ic joñon. Dios mi caj i mʌñon loq'uel ti' p'ʌtʌlel chʌmel. Dios mi caj i pʌyon ti' tojlel.

¹⁶ Mach a cha'len bʌq'uen che' mi' yochel ti rico juntiquil winic, Che' mi' p'ojlel i chubʌ'an ti' yotot.

¹⁷ Come ma'anic chuqui mi caj i ch'ʌm majlel che' mi' chʌmel. Ma'anix i ñuclel ba' mi' c'otel,

¹⁸ Anquese tijicña cha'an cabʌl i chubʌ'an che' cuxul to, Come winicob mi' c'uxbiñob jini wen chumul bʌ.

¹⁹ Muq'uix i chʌmel che' bajche' yaño' bʌ. Mach chʌn q'uelelix i cha'an i sʌclel pañimil ti pejtelel ora.

²⁰ Jini winic mu' bʌ i c'uxbintel, mi ma'anic mi' ch'ʌmben isujm, Lajalʌch bajche' jini bʌte'el mu' bʌ i jilel.