Salmos 48 - Chol: I T’an Dios

I t'ojol jax Sion

¹ Ñuc lac Yum. Yom cabʌl mi' sujbel i ñuclel. Chumul Dios ti Jerusalén am bʌ ti ch'ujul bʌ wits i c'aba' Sion.

² I t'ojol jax ya' ba c'ʌcʌl ti chan bʌ wits, i c'aba' Sion ti' tojel norte. I tijicñʌyelʌch pejtel pañimil, I tejclum jini ñuc bʌ Rey.

³ Ya' ti colem otot tac am bʌ ti Sion Dios tsi' pʌsʌ i bʌ. Jiñʌch la caj Coltaya.

⁴ Awilan tsi' tempayob i bʌ jini reyob. Temel tsa' tiliyob ti' contra Israel.

⁵ Che' bʌ tsi' q'ueleyob Sion tsa' toj sajtiyob i pusic'al. Tsi' cha'leyob bʌq'uen. Tsa' puts'iyob majlel.

⁶ Tsiltsilñayob tsi' cha'leyob bʌq'uen. Tsi' yubiyob wocol lajal bajche' x'ixic mu' bʌ i cha'len bajq'uel.

⁷ Che'ʌch ma' jem tac colem barco i cha'an Tarso. Ma' jem yic'ot jini ic' loq'uem bʌ ba' mi' pasel q'uin.

⁸ Lajal bajche' tsa cubi lojon tsa'ix j q'uele lojon ti' tejclum lac Yum Dios, Ti' tejclum i Yum Panchan yic'ot Pañimil. Dios mi caj i xuc'chocon cha'an mach jilic ti pejtelel ora.

⁹ Ya' ti mal a Templo, c Dios, mic ña'tan lojon bajche' c'ux ma' wubiñon lojon.

¹⁰ Baqui jach mi' cʌjñel a c'aba' Mi' sujbel a ñuclel ti pejtelel pañimil, Come tojatax pejtel chuqui ma' mel.

¹¹ La' i yubiñob tijicña año' bʌ ti wits i c'aba' Sion. La' i yubiñob tijicña año' bʌ ti' tejclum tac Judá, Come toj ma' cha'len meloñel.

¹² Cha'lenla xʌmbal ti Sion, joy xʌñʌla. Tsiquila jini chan bʌ q'ueloñib ya' ti' ts'ajquil.

¹³ Wen q'uelela jini wa'chocobil bʌ mu' bʌ i joy mʌctan Yic'ot jini ts'ajquibil tac bʌ otot, Cha'an mi la' suben la' walobilob.

¹⁴ Come Dios jiñʌch lac Dios ti pejtelel ora. Mi caj i toj'esañonla majlel c'ʌlʌl jinto mi lac chʌmel.