Salmos 46 - Chol: I T’an Dios

Dios jiñʌch la caj Coltaya

¹ Dios lac p'ʌtʌlelʌch, ba' mi lac majlel ti puts'el. Wʌ'ʌch an la quic'ot cha'an mi' coltañonla che' an bʌbʌq'uen bʌ.

² Jini cha'an anquese mi' yʌsiyel pañimil ma'anic lac bʌq'uen. Anquese mi ñijcʌyel ochel wits ti mal ñajb,

³ Anquese wen c'am mi' cha'len t'an jini wʌlʌcña bʌ colem ja', Anquese mi' ñijcʌyel wits, Ma'anic mi lac cha'len bʌq'uen.

⁴ Jini colem ja' loq'uem bʌ ba'an Dios Mi' yʌq'uen i tijicñʌyel jini año' bʌ ti' tejclum Dios. Jini Ch'ujul bʌ Ajñibʌl i cha'añʌch jini C'ax Ñuc Bʌ.

⁵ Dios an ti' yojlil jini Tejclum, jini cha'an ma'anic mi caj i ñijcʌntel. Dios mi caj i bʌc' coltan jini año' bʌ ti Tejclum che' ti sʌc'ajel.

⁶ Mi' mich'añob yumʌlob ti pañimil. Woli' chilbentelob i yumʌntel. Mi' toj sajtel i pusic'al jini año' bʌ ti pañimil, Che' mi' cha'len t'an Dios.

⁷ Lac Yum an la quic'ot. I Yumʌch panchan yic'ot pañimil. I Dios Jacob jiñʌch la caj Coltaya i wenta chan bʌ ts'ajc.

⁸ La'la, q'uelbenla i melbal lac Yum. Q'uelela bajche' tsi' cha'le jisaya ti lum.

⁹ Mi' yujtesan guerra c'ʌlʌl ti pejtelel pañimil. Mi' bic'ti c'ʌs jini jalʌjb, mi' c'ʌs jini lanza. Mi' pulbeñob i carreta tac mu' bʌ i c'ʌñob ti guerra.

¹⁰ Ch'abixla, ña'tanla joñon Dioson. Ñuc mi caj i q'ueloñob ti yan tac bʌ lum, Mi caj c ñuq'uesʌntel ti pañimil, che'en.

¹¹ I Yum Panchan yic'ot Pañimil an la quic'ot. I Dios Jacob jiñʌch la caj Coltaya i wenta chan bʌ ts'ajc.