Salmos 41 - Chol: I T’an Dios

Mi' c'ajtin i c'oc'lel

¹ Tijicña jini mu' bʌ i ña'tan jini p'ump'un bʌ. Lac Yum mi caj i col che' mi' yubin wocol.

² Lac Yum mi caj i cʌntan, mi caj i coltan. Tijicña mi caj i yajñel ti pañimil. Ma'anic mi caj i cʌy jini winic ti' p'ʌtʌlel i contrajob.

³ Lac Yum mi caj i cʌntan che' c'am. Mi caj i coltan che' woli ti wocol.

⁴ Jixcu joñon, c Yum, a wocolic pʌsbeñon i yutslel a pusic'al. Ñusʌbeñon c mul come tsac cha'le mulil ti a contra.

⁵ Jini j contrajob mi' p'ajoñob: ¿Baqui ora mi caj i chʌmel? ¿Baqui ora mi caj i ñajiyel i c'aba'? che'ob.

⁶ Ba' ora mi' tilel i q'uelon j contra mi' cha'len lot. Mi' ña'tan i jop'beñon c mul. Che' mi' loq'uel mi' puc majlel.

⁷ Pejtel mu' bʌ i ts'a'leñon mi' mucu temob i t'an tij contra. Mi' ña'tañob i yʌsañon yic'ot i jontolil. Mi' yʌlob:

⁸ Mach chʌn colix ti wocol. Mach chʌn mejlix ti ch'ojyel ba' ñolol, che'ob.

⁹ Tsi' tsa'leyon ja'el juntiquil c pi'ʌl Tsa' bʌ c ch'ʌmʌ tic wenta, tsa' bʌ i c'uxu waj quic'ot.

¹⁰ C Yum, pʌsbeñon i yutslel a pusic'al. P'ʌtesañon cha'an mij q'uextʌbeñob i jontolil.

¹¹ Che' jini tsiquil mi uts'at ma' q'uelon. Tsa' coloyon loq'uel ti' c'ʌb j contra ame mi' t'uchtañon.

¹² Wola wʌq'ueñon a p'ʌtʌlel cha'an chʌn xuc'ul mi cajñel. Wola' cʌntañon ti pejtelel ora. Añon ti a wenta.

¹³ La' sujbic i ñuclel lac Yum, i Dios Israel, mach bʌ anic i cajibal mach bʌ anic i jilibal. Che'ʌch yom. Amén.