Salmos 4 - Chol: I T’an Dios

Oración che' ti ic'ajel

¹ C Dios, tojetʌch. Jac'beñon c t'an che' mic pejcañet. Che' bʌ tsa cubi wocol tsa' ñuq'uesʌbeyon c pusic'al. Pʌsbeñon i yutslel a pusic'al. Ubibeñon coración.

² Winicob, ¿jayp'ejl to q'uin mi caj la' ts'a'libeñon c ñuclel? ¿Jayp'ejl to q'uin mi caj la' c'uxbin jini dioste' tac? ¿Jayp'ejl to q'uin mi caj la' mulan lot?

³ Ña'tanla, i cha'anobʌch lac Yum jini mu' bʌ i bʌc'ñañob. Lac Yum tsi' yajcayob. Lac Yum mi' yubiñon che' mij c'ajtiben j coltʌntel.

⁴ Bʌc'ñanla lac Yum. Mach mi la' cha'len mulil. Ña'tanla Dios ti la' pusic'al che' añetla ti la' wʌyib. Ñʌch'ʌl yom la' pusic'al.

⁵ Aq'uenla tsʌnsʌbil bʌ i majtan che' bajche' yom Dios. Ñopola lac Yum.

⁶ Cabʌlob mi' yʌlob: ¿Majqui mi caj i pʌsbeñonla chuqui tac wen? che'ob. C Yum, q'ueleyon lojon ti uts'at.

⁷ Tsa' wʌq'ueyon i tijicñʌyel c pusic'al ñumen bajche' mi' tajob winicob Che' mi' p'ojlel i cuch cholel yic'ot i ya'lel ts'usub.

⁸ Ti' ñʌch'tʌlel c pusic'al mi caj c ñoltʌl. Mij caj ti wʌyel, Come jatet jach c Yum, ma' cʌntañon cha'an mi cajñel ti xuc'ul.