Salmos 39 - Chol: I T’an Dios

Ñumel jach woliyonla ti pañimil

¹ Tsa cʌlʌ: Mi caj c chʌcʌ cʌntan c bʌ, Ame lecojic mic cha'len t'an. Mi caj cotsan freno ti quej, Che' añon ti' tojlel jini jontolo' bʌ, cho'on.

² Ma'anic tsac cha'le t'an, ñʌch'ʌlon. Ma'anic tsac taja i ñuq'uesʌntel c pusic'al. Tsa' utsi p'ojli c ch'ijiyemlel.

³ Tsac mele c pusic'al. Che' bʌ tsac cha'le t'an tic pusic'al tsac wen cha'le pensar. C'am tsac pejca Dios ti oración:

⁴ C Yum, la' c ña'tan mi caj j cʌy pañimil. Xñumelon jach ti pañimil. La' c ña'tan c'uñon jach.

⁵ Ma'anic jayñajb tsa' wʌq'ueyon j q'uiñilel. Ma'anic cabʌl c jabilel ti a wut. Ora jach mi' ñumel c jabilel lojon che' bajche' ic' mu' bʌ i loq'uel ti quej.

⁶ Che'ʌch añon lojon bajche' axñal mu' bʌ ti ñumel majlel. Lolom jach mic mel lojon c pusic'al. Anquese mic tempan lojon c chubʌ'an, mach cujilic lojon majqui mi caj i ch'ʌm.

⁷ Wʌle, c Yum, ¿chuqui to yom mic pijtan? Wolic pijtañet.

⁸ Chucuyon loq'uel ti pejtelel c mul. Mach a wʌc'on ti ts'a'lentel ti' tojlel tonto bʌ.

⁹ Tsaj cʌyʌ c cha'len t'an. Ma'anix mi caw quej, Come jatet tsa' wʌc'ʌyon ti wocol.

¹⁰ Mach a chʌn jats'on. Lujbonix cha'an wola' jats'on ti a c'ʌb yilal.

¹¹ Che' ma' wʌq'ueñon lojon c tsico' pusic'al cha'an lojon c mul, ma' ju'sʌbeñon lojon c pusic'al. Ma' jisʌbeñon lojon c t'ojlʌwel. Lecojon lojon bajche' pisil am bʌ i jo'ch'il. Che'ʌch añon lojon bajche' ic' woli bʌ ti loq'uel ti quej.

¹² C Yum, ubibeñon coración, ubibeñon cuq'uel. Q'uele i ya'lel c wut, mach a ñusañon. Xñumelon jach ti pañimil, che' bajche' pejtel c ñojte'el.

¹³ Mach a chʌn q'uelon ti a mich'ajel. La' poj ajnicon ti tijicña, Jinto mij cʌy pañimil, jinto che' mach chʌn tsiquilonix.