Salmos 38 - Chol: I T’an Dios

Mi' sub i mul

¹ C Yum, mach ma' wʌ'leñon ti a mich'ajel. Mach ma' ju'sʌbeñon c pusic'al che' mich'et.

² Tsa'ix a jec'beyon c pusic'al che' bajche' ti jalʌjb. Wola' c'uchye'on jubel ti a c'ʌb.

³ Ma'anic i c'oc'lel c bʌc'tal come mich'et. Ma'anic j c'oc'lel come an c mul.

⁴ Come jini c jontolil tsa'ix i teñeyon jubel. Yom i c'ʌson che' bajche' al bʌ cuchʌl.

⁵ Mi' tuw'an c tsoy tac. Mi' yoc'mʌl Cha'an c tontojlel.

⁶ C'uchulon, wen peq'uesʌbilon. C'ʌlʌl mi' sʌc'an c'ʌlʌl mi' yic'an wen ch'ijiyemon.

⁷ Wen ticʌw jax c pusic'al yubil. Ma'anic i c'oc'lel c bʌc'tal.

⁸ Wen c'uñucñayon jax. Ma'anix c p'ʌtʌlel. Ajacñayon, wolic mel c pusic'al.

⁹ C Yum, cʌmbil a cha'an pejtel chuqui tac com. Mach muculic ti a wut che' mic cha'len ajacñiyel.

¹⁰ T'ʌlt'ʌlña jax c pusic'al. Tsa'ix jili c p'ʌtʌlel. Mach c'otix c wut.

¹¹ Jini c'uxbibilo' bʌ c cha'an yic'ot j cʌñʌyo' bʌ tsa'ix i cʌyʌyoñob cha'an j c'amʌjel. Ñajt tsi' tʌts'ʌyob i bʌ c pi'ʌlob.

¹² Jini yomo' bʌ i tsʌnsañon woli' chajpañob i yac. Jini yomo' bʌ i tic'lañon woli' temob i t'an cha'an mi' jisañon. Ti sʌc'ajel c'ʌlʌl ti ic'ajel mi' ña'tañob i tech jontolil.

¹³ Pero lajalon bajche' xcojc. Ma'anic mi cubin. Lajalon bajche' x'uma' mach bʌ yujilic t'an.

¹⁴ Isujm, lajaloñʌch bajche' winic mach bʌ anic mi' yubin. Ma'anic mic letsan c t'an.

¹⁵ Come wolic pijtañet c Yum. Mi caj a jac'beñon coración, c Yum Dios.

¹⁶ Ju'sʌbeñob i pusic'al, cho'on. Machiqui, mi caj i mʌjlel i cha'añob. Mi caj i chañ'esañob i bʌ tij contra che' colel c yajlel.

¹⁷ Come bʌbʌq'uen mic yajlel. Ma'anic mi' wis lajmel i ch'ijiyemlel c pusic'al.

¹⁸ Jini cha'an wolic sub c mul. Wolic mel c pusic'al cha'an c mul.

¹⁹ Cabʌl ch'ejlo' bʌ mi' contrajiñoñob, Cabʌl mi' ts'a'leñoñob.

²⁰ Mi' sutq'uibeñoñob jontolil ti wen bʌ c melbal. Mi' contrajiñoñob cha'an com c mel chuqui uts'at.

²¹ C Yum, mach ma' cʌyon. C Dios, mach ma' tʌts' a bʌ ba' añon.

²² Coltañon ti ora, C Yum, caj Coltayajet c cha'an.