Salmos 35 - Chol: I T’an Dios

Woli' contrajintel che' ma'anic i mul

¹ C Yum, yom ma' contrajiñob mu' bʌ i contrajiñon. Cha'len guerra yic'otob.

² Chajpan a bʌ, ch'ʌmʌ a mʌctʌjib. La' tic t'ejl cha'an ma' coltañon.

³ Loc'san e'tʌjibʌl cha'an guerra ti' yotot, Cha'an ma' mʌctʌbeñob i bijlel mu' bʌ i yajñesañoñob.

⁴ La' toj sajticob i pusic'al. La' i cha'leñob quisin mu' bʌ i tic'lañoñob. La' sujticob, la' yajlicob.

⁵ La' sujticob bajche' i sujl pʌc'ʌbʌl mu' bʌ i wejlan ic'. La' ajñesʌnticob cha'an i yAngel lac Yum.

⁶ La' ochic ac'ʌlel ti' bijlel, la' bojy'ac. La' ajñesʌnticob cha'an i yAngel lac Yum.

⁷ Tsi' top'oyob ch'en cha'an mi yʌcoñob che' bajche' bʌte'el.

⁸ La' jisʌnticob che' mach yʌxʌlobic i yo. La' to wʌlʌc chujquicob ti' yac tsa' bʌ i meleyob. La' wʌlʌc jisʌnticob ya'i.

⁹ Mi caj cubin i tijicñʌyel c pusic'al ti lac Yum. Tijicña mi caj cubin che' mi' coltañon.

¹⁰ Mi caj c pejcañet che' c'oc'on to. C Yum, ¿majqui lajal bajche' jatet? Ma' chuc loq'uel jini p'ump'un bʌ ti' c'ʌb jini ñumen p'ʌtʌl bʌ. Ma' loc'san jini tic'lʌbil bʌ yic'ot jini pobre bʌ ti' p'ʌtʌlel jini yom bʌ i jisan.

¹¹ Tsa'ix caji i jop'ob c mul xlotob. Tsi' jop'oyob jini mach bʌ c'ajalic c cha'an.

¹² Mi' sutq'uibeñoñob jontolil cha'an c wenlel. Wen ch'ijiyem tsa' cʌleyon.

¹³ Pero mach che'ic tsac melbeyob. Che' c'amob tsac lʌpʌ coxtal i yejtal i ch'ijiyemlel c pusic'al. Tsac cha'le ch'ajb, tsac peq'uesa c bʌ. Tsac lon cha'le oración.

¹⁴ Ch'ijiyemon tsac liji c bʌ che' bajche' mi la cuc'tan lac ña' yic'ot la queran.

¹⁵ Mach che'ic tsi' melbeyoñob. Che' c'uñon ti xʌmbal tijicñayob. Tsi' tempayob i bʌ jini xjop't'añob tij contra yic'ot jini mach bʌ cʌmbilobic c cha'an. Tsi' cha'leyob u'yaj. Ma'anic tsa' lujb'ayob ti p'ajoñel.

¹⁶ Tsi' wajleyoñob, tsi' p'ajayoñob.

¹⁷ C Yum, ¿jayp'ejl to q'uin mi caj a q'uel? Loc'sañon ti' p'ʌtʌlel jini mu' bʌ i jisañon, Loc'sañon ti' tojlel tac bajlum.

¹⁸ Mi caj c subeñet wocolix a wʌlʌ ba' mi' tempañob i bʌ cabʌlob. Mi caj c sub a ñuclel ti' tojlel cabʌl winicob x'ixicob.

¹⁹ Mach ñuc'ac i pusic'al j contrajob mu' bʌ i jop'ob c mul. Anquese ma'anic c mul mi' ts'a'leñoñob.

²⁰ Mach utsic i t'an, mi' techob a'leya. Mi' jop'ob lot cha'an mi' yʌc'ob ti wocol jini ñʌch'ʌlo' bʌ ti pañimil.

²¹ Ts'a' mi' q'ueloñob. Tsi' yʌlʌyob: Jajaja, tsa'ix j q'uele lojon, che'ob.

²² C Yum, tsa'ix a q'uele bajche' mi' melob. Mach yomic che jach ma' q'uelob. La', c Yum, mach yomic ma' jalijel ti ñajtʌl.

²³ Wa'i' ti meloñel, C Dios, c Yum, tsictesañon ti toj.

²⁴ C Yum Dios, yom ma' tsictesan toj bʌ c pusic'al. Mach mi' mʌjlel i cha'añob tic tojlel

²⁵ Ame mi' lon ña'tañob ti' pusic'al wolic yajlel che' bajche' yomob. Ame mi' yʌlob: Tsa'ix lac mʌlʌ, ame che'obic.

²⁶ La' i yubiñob quisin. La' toj sajticob i pusic'al mu' bʌ i mulan i tic'lañoñob. La' i yubiñob quisin. Chilbeñob i ñuclel jini mu' bʌ i chañ'esañob i bʌ tij contra.

²⁷ La' i cha'leñob c'ay mu' bʌ i q'ueloñob ti toj. La' ñuc'ac i pusic'al. La' i yʌlob ti pejtelel ora: La' sujbic i ñuclel lac Yum, che'ob Come tijicña lac Yum che' wen chumul i winic.

²⁸ Mi caj c sub toj bʌ a melbal yic'ot a ñuclel, c Yum, ti pejtelel ora.