Salmos 32 - Chol: I T’an Dios

I wenlel jini ñusʌbilo' bʌ i mul

¹ Tijicña jini ñusʌbilix bʌ i mul ti lac Yum, Mach bʌ wolix i chʌn na'tʌbentel.

² Tijicña jini winic mach bʌ anix mi' tajtʌl i jontolil cha'an ñusʌbil ti Dios. Mach yujilic lot ili winic.

³ Che' ma'anic tsac subu c mul, tsa' caji ti jilel c bʌquel. Tsac cha'le ajacñʌyel ti pejtelel q'uin.

⁴ Come tsa' teñeyon ti a c'ʌb ti ac'ʌlel yic'ot ti q'uinil. Tsa' tiquesa yilal c bʌc'tal che' bajche' ti' yorajlel jajmel.

⁵ Tsac subeyet c mul, ma'anic tsac mucu c mul. Tsa cʌlʌ: Mi caj c subeñet c jontolil c Yum, cho'on. Jatet tsa' ñusʌbeyon c mul yic'ot c jontolil.

⁶ Jini cha'an la' i pejcañet ti oración pejtel a cha'año' bʌ che' ti' yorajlel wocol. Che' mi' bujt'el colem ja' mach pajmic ba' añob.

⁷ C puts'ibet, Mi caj a cʌntañon che' mi' tajon wocol. Mi caj c cha'len c'ay cha'an wola' joy coltañon.

⁸ Woli' yʌl lac Yum: Mi caj j cʌntesañet. Mi caj c pʌsbeñet jini bij baqui yom ma' majlel. Mi caj c toj'esañet majlel tic wut.

⁹ Mach yomic lajalet bajche' caballo mi mula mach bʌ anic i ña'tʌbal. Mi' toj'esʌntel majlel ti freno. Machiqui, mach majlic ya' baqui awom, che'en.

¹⁰ Cabʌl mi' yubiñob wocol jini jontolo' bʌ. Jini mu' bʌ i ñop lac Yum joyolʌch ti' yutslel.

¹¹ La' ñuc'ac la' pusic'al ti lac Yum tojet bʌ la. Yom tijicñayetla. Cha'lenla c'am bʌ t'an cha'an la' tijicñʌyel pejtelel toj bʌ la' pusic'al.