Salmos 30 - Chol: I T’an Dios

Tsa' coli ti c'amʌjel

¹ C Yum, mi caj c sub a ñuclel, come tsa'ix a ñuq'uesʌbeyon c pusic'al. Tsa'ix a tiq'ui j contrajob. Ma'anic tsa' mʌjli i cha'añob.

² C Yum Dios, c'am tsac pejcayet. Tsa' c'oq'uesayon.

³ C Yum, tsa' loc'sayon ti' yajñib chʌmeño' bʌ. Tsa' cha' ch'ejlesayon cha'an ma'anic mic jubel ti mucoñibʌl.

⁴ C Yum, la i c'ʌyiñob a ñuclel a cha'año' bʌ. La' i subob wocolix i yʌlʌ che' mi' ña'tañob ch'ujul a c'aba'.

⁵ Jumuc' jach mich'et, c Yum. Ma'anic ma' cʌy a pʌsbeñon lojon a wutslel che' cuxulon to lojon. Poj ch'ijiyemon lojon jump'ejl ac'ʌlel, Tijicña c pusic'al lojon che' ti sʌc'ajel.

⁶ Che' tijicñayon tsa cʌlʌ: Chʌn xuc'ulon mi caj cajñel ti pejtelel ora, lon cho'on.

⁷ C Yum, cha'an jach ti' yutslel a pusic'al poj xuc'ulon bajche' wits. Che' bʌ tsa' mʌyʌ a wut, tsa' caji c mel c pusic'al.

⁸ C Yum, c'am tsac pejcayet. Tsaj c'ajtibeyet ti wocol t'an:

⁹ Mi tsa' chʌmiyon, mi tsa' oc'mi c bʌc'tal, ¿chuqui to j c'ʌjñibal? ¿Mejl ba i sub a ñuclel jini ts'ubejn?

¹⁰ Ubiñon c Yum, pʌsbeñon i yutslel a pusic'al. C Yum, ochen ti caj cʌntaya.

¹¹ Tsa'ix a q'uextʌbeyon i ch'ijiyemlel c pusic'al. Tsa'ix a wʌc'ʌyon ti son. Tsa' jochbeyon loq'uel j coxtal i yejtal i ch'ijiyemlel c pusic'al. Tsa' lʌpbeyon yilal tijicña bʌ c pusic'al.

¹² Jini cha'an mij c'ʌyin a ñuclel, Ma'anic mic ñʌjch'el. C Yum Dios, mi caj c subeñet wocolix a wʌlʌ ti pejtelel ora.