Salmos 29 - Chol: I T’an Dios

I p'ʌtʌlel lac Yum yic'ot i ñuclel

¹ La' i subob i ñuclel lac Yum jini ángelob. La' i subob i ñuclel lac Yum yic'ot i p'ʌtʌlel.

² Suben i ñuclel lac Yum come ñuc i c'aba'. Ch'ujutesan lac Yum am bʌ ch'ujul bʌ i t'ojlʌwib.

³ Mi' tsictiyel i t'an lac Yum ti tocal. Lajal i t'an lac Yum bajche' i t'an chajc. Mi la cubiben c'am bʌ i t'an lac Yum ya' ti tocal.

⁴ P'ʌtʌl i t'an lac Yum, Wen ñuc i t'an lac Yum.

⁵ Lac Yum mi' top' jini ch'ujte' che' mi' cha'len t'an. Isujm lac Yum mi' top' jini ch'ujte' am bʌ ti Líbano wits.

⁶ Cha'an ti' p'ʌtʌlel lac Yum mi' ñijcʌyel wits, Líbano yic'ot Sirión. Mi' tijp'el yilal che' bajche' alʌ wacax.

⁷ Lac Yum mi' yʌc' i t'an, Mi' t'oxtʌl i c'ʌc'al chajc.

⁸ Lac Yum mi' yʌc' i t'an, mi' yujcun i bʌ jini jochol bʌ lum. Lac Yum mi' yujcun jini colem bʌ i tiquiñal lum i c'aba' Cades.

⁹ Lac Yum mi' yʌc' i t'an, yuquiña jini c'olol ti ic'. Mi' p'ajtel i yopol te'. Mi' subob i ñuclel pejtel año' bʌ ti' yotot lac Yum.

¹⁰ Mi' yajñel lac Yum ti pam but'ja'. Lac Yum mi' cha'len yumʌl ti pejtelel ora.

¹¹ Lac Yum mi' yʌq'ueñob i p'ʌtʌlel i cha'año' bʌ. Lac Yum mi' yʌq'ueñob i ñʌch'tʌlel i pusic'al.