Salmos 27 - Chol: I T’an Dios

Lac Yum jiñʌch c sʌclel, jiñʌch caj Coltaya

¹ Caj Coltaya c Yum. Mi' yʌc'on ti ajñel ti' sʌclel. ¿Yom ba mic bʌc'ñan winic? C Yum mi' coltañon che' an j contrajintel. ¿Majqui mi caj c bʌc'ñan che' jini?

² Che' bʌ tsa' tiliyob j contrajob cha'an mi' jisʌbeñon c bʌc'tal, Tsi' p'ojquiyob i yoc jini ts'a' bʌ tsi' q'ueleyoñob. Tsa' yajliyob.

³ Anquese cabʌlob j contrajob mu' bʌ i tempañob i bʌ, Ma'anic mic cha'len bʌq'uen. Anquese mi' tejchel guerra tic tojlel, Chʌn xuc'ul c pusic'al ti lac Yum.

⁴ Jini jach tsaj c'ajtibe c Yum: Com chumtʌl ti' yotot c Yum ti pejtelel q'uin che' cuxulon to, Cha'an mij q'uelben i yuts'atlel c Yum, Cha'an mic ña'tan ya' ti' Templo. Jiñʌch mu' bʌ c sajcan.

⁵ Come ti' yorajlel wocol mucul mi caj i cʌntañon ya' ti' yotot. Mi caj i mucon ti xuc'ul bʌ otot ba' ma'anic mi' tajon j contra. Xuc'ul mi caj i yʌc'on ti pam xajlel yilal

⁶ Ba' mach mejlic i c'otelob j contrajob. Mi caj cʌq'uen tsʌnsʌbil bʌ i majtan c Yum ti' tijicñʌyel c pusic'al ti pisil bʌ i yotot. Mi caj j c'ʌyiben i ñuclel c Yum.

⁷ Jiñʌch coración: C Yum, ubibeñon che' c'am mic pejcañet. Pʌsbeñon i yutslel a pusic'al, jac'beñon.

⁸ Tsa' subeyon: Sajcañon cha'an ma' q'uelbeñon c wut, che'et. Tsac jac'ʌ: Wolic letsan c wut cha'an mij q'uelet, c Yum, cho'on.

⁹ Mach a mʌybeñon a wut. Mach a chocon che' mich'et, come a winicon. Tsa'ix a coltayon ti yambʌ ora. Mach a chocon, mach a cʌyon, Dios, caj Coltayajet.

¹⁰ Anquese cʌybilon tic tat tic ña', Mi caj a wotsañon ti a walobil.

¹¹ C Yum, cʌntesañon ti a bijlel. Pʌyʌyon majlel ti jini toj bʌ bij, Come mi' chijtañoñob j contrajob.

¹² Mach a wʌc'on ti' wenta jini mu' bʌ i tem ña'tañob i contrajiñon. Tsa' tejchiyob tij contra jini xjop't'añob. Ch'ejlob jax mi' melob i bʌ ti jontolil.

¹³ Cujil belel ora mi caj cubin i yutslel c Yum ila ti pañimil che' cuxulon to.

¹⁴ Pijtan lac Yum, yom ch'ejlet. La' xuc'lec a pusic'al. Yom cu ma' pijtan lac Yum.