Salmos 26 - Chol: I T’an Dios

Woli' tsictesan tojʌch i winic

¹ C Yum, tsictesañon cha'an tojon. Xuc'ul tsac mele chuqui wen. Tsa'ix c ñopoyet ti' xuc'tilel c pusic'al.

² C Yum, q'uelbeñon c pusic'al, ac'ʌyon ti prueba. Q'uele mi sʌc c pusic'al yic'ot c ch'ujlel.

³ Wolic chʌn ña'tan a wutslel. Mic mel che' bajche' tsa' cʌntesayon ti isujm.

⁴ Ma'anic mi cajñel yic'ot winicob yujilo' bʌ lot. Ma'anic mi cajñel yic'ot jini cha'p'ejl jach bʌ i pusic'al.

⁵ Mic ts'a'len jini mu' bʌ i cha'leñob mulil. Ma'anic mic tempan c bʌ yic'ot jini jontolo' bʌ.

⁶ Cha'an ma' q'uel ma'anic c mul mic poc j c'ʌb. C Yum, mic lʌc'tesan c bʌ ba'an i pulʌntib a majtan.

⁷ Mic subeñet wocolix a wʌlʌ. La' c sub pejtel a melbal come ñucatax.

⁸ C Yum, mij c'uxbin a wotot ba' ma' chumtʌl, Ya' ba' ma' pʌs a ñuclel.

⁹ Mach a pʌyon majlel yic'ot xmulilob. Mach a tsʌnsañon yic'ot stsʌnsajob.

¹⁰ Jontol i melbalob, Mi' ch'ʌmob cabʌl taq'uin ti' majtan.

¹¹ Ixcu joñon, toj mic cha'len xʌmbal. Mʌñʌyon loq'uel ti' p'ʌtʌlel mulil, pʌsbeñon a c'uxbiya.

¹² Mic ch'ujutesan lac Yum ba' mi lac tempan lac bʌ come woli' cʌntañon.