Salmos 21 - Chol: I T’an Dios

Tijicña cha'an tsa' loq'ui ti' p'ʌtʌlel i contra

¹ C Yum, tijicña mi caj i yubin jini rey cha'an a p'ʌtʌlel. Wen tijicña i pusic'al cha'an tsa' colta.

² Tsa'ix a wʌq'ue chuqui yom i pusic'al, Ma'anic tsa' ñusʌbe chuqui tsi' c'ajtibeyet.

³ Tsa'ix a wʌq'ue i wenlel jini rey. Tsa' c'ʌcbe ti' jol jump'ejl corona melbil bʌ ti oro.

⁴ Jini rey tsi' c'ajtibeyet i cuxtilel Cha'an mi' yajñel ti pejtelel ora.

⁵ Cha'an ti a coltaya cabʌlʌch i ñuclel. Wola' wʌq'uen i c'uxbintel yic'ot i ñuclel.

⁶ Come wola' wʌq'uen i yutslel a pusic'al mach bʌ anic mi' jilel. Ma' wʌq'uen i tijicñʌyel i pusic'al ti a tojlel.

⁷ Come jini rey mi' ñop lac Yum. Cha'an ti' yutslel jini C'ax Ñuc Bʌ xuc'ul mi' chʌn ajñel.

⁸ C Yum, mi caj a taj pejtelel a contrajob, pejtelel mu' bʌ i ts'a'leñetob.

⁹ Mi caj a wotsañob ti c'ajc che' ti' yorajlel a mich'ajel. C Yum, mi caj a jisañob che' mich'et.

¹⁰ Mi caj a laj jisan i yalobilob cha'an mach chʌn tsiquilobix ti' tojlel winicob.

¹¹ Tsi' ña'tayob ts'a'leya ti a contra. Tsi' ñopoyob i mel jontolil, pero ma'anic tsa' mejliyob.

¹² Mi caj i puts'elob che' mi' q'uelob a jalʌjb.

¹³ C Yum, la' tsictiyic a ñuclel yic'ot a p'ʌtʌlel. Mi caj j c'ʌyiñet lojon. Mi caj c sub ti ñuc a p'ʌtʌlel.