Salmos 2 - Chol: I T’an Dios

Yumʌlʌch jini yajcʌbil bʌ ti lac Yum

¹ ¿Chucoch mi' cha'leñob mich'ajel winicob x'ixicob? ¿Chucoch to'o lolom jach chuqui mi' ña'tañob ti' pusic'al?

² Jini reyob ti pañimil mi' chajpañob i bʌ. Jini yumʌlob mi' temob i t'an Cha'an mi' contrajiñob lac Yum, Yic'ot jini Rey Yajcʌbil bʌ i cha'an.

³ Mi' yʌlob: La' lac ts'ocbeñob i lazojlel mu' bʌ i cʌchonla. La' lac junyajlel choc jini lazo tac cha'an mi laj colel ti' p'ʌtʌlel Dios, che'ob.

⁴ Pero woli ti tse'ñal lac Yum ya' ti panchan. Woli' wajleñob.

⁵ Mich'icña mi caj i yʌ'leñob. P'ump'un mi caj i bʌc'tesañob cha'an cabʌl i mich'ajel.

⁶ Lac Yum mi caj i yʌl: Ya' ti Jerusalén, jini ch'ujul bʌ c tejclum, Tsa'ix c wa'choco c Rey, jini yajcʌbil bʌ c cha'an, che'en.

⁷ Jini Yajcʌbil bʌ woli' sub chuqui subebil ti lac Yum: C Yum tsi' subeyon: “Jatet Calobilet, Sajmʌl tsac techeyet.

⁸ C'ajtibeñon. Mi caj cʌq'ueñet winicob x'ixicob ch'oyolo' bʌ ti pejtelel pañimil. A cha'añobix mi' majlelob.

⁹ Mi caj a jisan winicob x'ixicob ti bara melbil bʌ ti tsucul taq'uin. Mi caj a bic'ti top'ob lajal bajche' mi' tojp'el p'ejt melbil bʌ ti lum”. Che' tsi' subeyon c Yum, che'en.

¹⁰ Jini cha'an la'ix julic la' pusic'al, reyet bʌ la. Yom mi la' jac' la' cʌntesʌntel jatetla am bʌ la' we'tel ti pañimil.

¹¹ Yom mi la' bʌc'ñan lac Yum che' mi la' ch'ujutesan. Yom tsiltsilña che' mi' ñucan la' pusic'al.

¹² Ts'ujts'unla i Yalobil lac Yum ame mich'ac, Ame jiliquetla ti la' bijlel Che' mi' bʌc' mich'an Dios. Tijicñayob pejtel mu' bʌ i sʌclañob i coltʌntel ti lac Yum.