Salmos 149 - Chol: I T’an Dios

La' i sub i ñuclel lac Yum Israel

¹ ¡Aleluya! C'ʌyiben lac Yum tsiji' bʌ c'ay. C'ʌyinla ba' mi' tempañob i bʌ i cha'año' bʌ.

² La' i yubiñob i tijicñʌyel israelob ti Dios tsa' bʌ i meleyob. La' i yubiñob i tijicñʌyel jini chumulo' bʌ ti Sion come yumʌlʌch i Rey.

³ La' i c'ʌyibeñob i ñuclel i c'aba' ti son, Yic'ot pandero yic'ot arpa.

⁴ Come lac Yum tijicña mi' q'uel i cha'año' bʌ. Mi' coltan jini utso' bʌ.

⁵ Yom tijicñayob i pusic'al, come añob i ñuclel mu' bʌ i tsajcañob Dios. La' i cha'leñob c'ay ti' wʌyib cha'an tijicñayob.

⁶ La' i c'ʌyiñob i ñuclel Dios jini Ñumen Ñuc Bʌ. La' i chucob espada cha'wejl bʌ i yej

⁷ Cha'an mi' q'uextʌbeñob i mul jini colem tejclum tac ti mojt ti mojt, Cha'an mi' ju'sʌbeñob i pusic'al.

⁸ Mi caj i cʌchob reyob ti cadena, Mi caj i cʌchob yumʌlob ti tsucul taq'uin.

⁹ Mi caj i yʌc'ob ti tojmulil che' bajche' ts'ijbubil. Jiñʌch i ñuclel pejtel i cha'año' bʌ mu' bʌ i tsajcañob. ¡Aleluya!