Salmos 147 - Chol: I T’an Dios

Dios woli' cha' mel Jerusalén

¹ Subula i ñuclel lac Yum. Uts'at mi laj c'ʌyiben i ñuclel lac Dios, Come uts i pusic'al. Uts'at mi' q'uelonla che' mi laj c'ʌyiben i ñuclel.

² Lac Yum woli' cha' mel Jerusalén. Mi' tempan tilel ti Israel jini chocbilo' bʌ.

³ Mi' lajmesʌbeñob i ch'ijiyemlel i pusic'al. Mi' lajmesʌbeñob i tsoy.

⁴ Mi' tsic jini ec'. Mi' yotsʌben i c'aba' ti jujump'ejl.

⁵ Ñuc lac Yum, cabʌl i p'ʌtʌlel. Ma'anic i p'isol i ña'tʌbal.

⁶ Lac Yum mi' p'ʌtesan jini utso' bʌ. Mi' jisʌbeñob i p'ʌtʌlel jini jontolo' bʌ.

⁷ C'ʌyinla lac Yum. Aq'uenla wocolix i yʌlʌ. Ñijcanla arpa cha'an mi' yubin Dios.

⁸ Jiñʌch mu' bʌ i mos panchan ti tocal. Mi' choc jubel ja'al ti pañimil. Mi' yʌc' ti colel jam ti bujbujtʌl.

⁹ Mi' yʌq'uen i buc'bal alʌc'ʌl Yic'ot i yal xwachin che' mi' yuc'tan.

¹⁰ Dios ma'anic mi' q'uel ti ñuc i ch'ejlel caballo. Ma'anic mi' q'uel ti ñuc i ch'ejlel winic.

¹¹ Pero tijicña lac Yum cha'an jini mu' bʌ i c'uxbiñob, mu' bʌ i xuc'chocoñob i pusic'al ti' yutslel i t'an.

¹² Subula i ñuclel lac Yum añet bʌ la ti Jerusalén. Subula i ñuclel la' Dios, añet bʌ la ti Sion.

¹³ Come tsa'ix i tsʌtsesa la' puertajlel. Tsa'ix i yʌq'ueyob i wenlel la' walobilob año' bʌ ti la' tojlel.

¹⁴ Mi' yʌc' ti lajmel guerra ya' ti la' lumal. Mi' yʌq'ueñetla jini wen bʌ trigo.

¹⁵ Mi' choc tilel i mandar ti pañimil. Ti ora jach mi' ñumel majlel i t'an.

¹⁶ Mi' yʌc' i ña'al tsʌñal i mos lum. Mi' pam puc che' bajche' mi lac puc i tiñil c'ajc.

¹⁷ Mi' choc jubel tuñija'. ¿Majqui mi mejlel i cuchben i tsʌñʌlel?

¹⁸ Mi' yʌc' i t'an, mi' yulmʌl. Mi' choc tilel ic'. Jini ja' mi' cajel ti ajñel.

¹⁹ Tsi' yʌq'ue i t'an Jacob. Tsi' subeyob israelob i mandar yic'ot i ley.

²⁰ Mach che'ic tsi' mele ti' tojlel yan tac bʌ colem tejclum ba' mach cʌmbilic i t'an. Subula i ñuclel Dios.