Salmos 146 - Chol: I T’an Dios

Dios mi' coltan jini p'ump'uño' bʌ

¹ ¡Aleluya! Yom mic sub i ñuclel c Yum ti pejtelel c pusic'al.

² Mi caj c chʌn sub i ñuclel lac Yum che' cuxulon to. Mi caj j c'ʌyiben i ñuclel c Dios che' wʌ' to añon.

³ Mach mi la' wʌc' la' pusic'al yic'ot jini yumʌlob ti pañimil, Come winicob jach. Mach muq'uic i coltañonla.

⁴ Che' mi' cʌy i japob ic' mi' sujtelob ti lum. Ti jini jach bʌ q'uin mi' to'ol jilel chuqui tsi' ña'tayob i mel.

⁵ Tijicña mu' bʌ i taj i coltʌntel ti' Dios Jacob. Ñʌch'ʌl i pusic'al woli' pijtan lac Yum, come jiñʌch i Dios.

⁶ Jiñʌch tsa' bʌ i mele panchan yic'ot pañimil Yic'ot colem ñajb yic'ot pejtel i bʌl.

⁷ Mi' mel ti toj jini tic'lʌbilo' bʌ. Mi' yʌq'ueñob i waj jini año' bʌ i wi'ñal. Lac Yum mi' yʌc' ti colel jini ñup'ulo' bʌ.

⁸ Lac Yum mi' cambeñob i wut jini xpots'ob. Lac Yum mi' tijicñesʌbeñob i pusic'al jini ch'ijiyemo' bʌ. Lac Yum mi' c'uxbin jini tojo' bʌ i pusic'al.

⁹ Lac Yum mi' cʌntan jini ch'oyolo' bʌ ti yambʌ lum. Mi' coltan meba' x'ixicob yic'ot meba' alʌlob, Pero mi' jisʌbeñob i tijicñʌyel jini jontolo' bʌ. Mi' tajob wocol ti' jilibal.

¹⁰ Lac Yum mi' cha'len yumʌntel ti pejtelel ora. Jiñʌch la' Dios, añet bʌ la ti Sion. I Diosʌch la' walobilob yic'ot i yalobilob ti lajm ti lajm. ¡Aleluya!