Salmos 145 - Chol: I T’an Dios

Mach lu' cʌmbilic i ñuclel Dios yic'ot i yutslel

¹ Mi caj c sub a ñuclel, Dios. C Reyet. Mi caj c ch'ujutesan a c'aba' ti pejtelel ora.

² Ti jujump'ejl q'uin mi caj c ch'ujutesañet. Mi caj c sub i ñuclel a c'aba' ti pejtelel ora.

³ Wen ñuc lac Yum. La' sujbic i ñuclel. Ma'anic i p'isol i ñuclel.

⁴ Winicob x'ixicob mi caj i subeñob i yalobilob wen ñuc a melbal. Mi caj i subeñob bajche' tsa' pʌsbeyob i yejtal tac a p'ʌtʌlel.

⁵ Mi caj c chʌn ña'tan i t'ojol jax ba' buchulet ti ñuc bʌ a we'tel. Uts'atax a melbal.

⁶ Ti pejtelel pañimil mi caj i subob cabʌl jax a p'ʌtʌlel, bʌbʌq'uen a melbal. Joñon ja'el mi caj c sub wen ñuquet.

⁷ Winicob x'ixicob mi caj i subob uts'atax a pusic'al. C'am mi caj i c'ʌyiñet cha'an tojet.

⁸ Uts lac Yum, wen yujil p'untaya. Jal mi' mich'an. C'ux mi' yubiñonla.

⁹ Lac Yum mi' pʌsbeñob i yutslel i pusic'al pejtel winicob x'ixicob. Mi' p'untañob come laj i melbalʌch.

¹⁰ C Yum, pejtelel a melbal mi caj i tsictesan a ñuclel. Pejtel jini ch'ujulo' bʌ a cha'an mi caj i ch'ujutesañet.

¹¹ Mi caj i subob wen ñuc a yumʌntel, Cabʌl a p'ʌtʌlel.

¹² Mi caj i subeñob i yalobilob jini ñuc bʌ a melbal, Yic'ot i t'ojlʌwel a yumʌntel ya' ba' buchulet ti ñuc bʌ a we'tel.

¹³ Mach jilic a yumʌntel. An ti pejtelel ora. An a yumʌntel ti wajali yic'ot ti pejtelel ora.

¹⁴ C Yum, ma' wʌq'ueñob i p'ʌtʌlel pejtel mu' bʌ i yajlelob. Ma' tijicñesʌbeñob i pusic'al jini ch'ijiyemo' bʌ.

¹⁵ Ti pejtelelob mi' pijtañet. Ma' wʌq'ueñob i bʌl i ñʌc' che' ti' yorajlel.

¹⁶ Mach chʌquetic. Mi' ñaj'añob pejtel jini cuxulo' bʌ.

¹⁷ Toj lac Yum ti pejtelel chuqui tac mi' mel. Tsiquil i yutslel ti pejtelel i melbal.

¹⁸ Lʌc'ʌl an lac Yum ti' tojlel pejtel mu' bʌ i pejcañob ti pejtelel i pusic'al.

¹⁹ Mi' yʌq'ueñob chuqui yomob jini mu' bʌ i c'uxbiñob Dios. Mi' yubibeñob i t'an che' mi' pejcañob. Mi' coltañob.

²⁰ Lac Yum mi' cʌntan pejtel mu' bʌ i c'uxbiñob. Mi caj i jisan pejtel jini jontolo' bʌ.

²¹ Joñon mi caj c sub i ñuclel lac Yum. La' i ch'ujutesañob Dios pejtel winicob x'ixicob. Ch'ujul i c'aba' wʌle yic'ot ti pejtelel ora.