Salmos 143 - Chol: I T’an Dios

Cabʌl i wocol ti' tojlel i contra

¹ C Yum, ubibeñon coración. Ñich'tʌbeñon chuqui wolij c'ajtibeñet. Jac'beñon, come xuc'ul a pusic'al, toj ja'el.

² A winicon, mach a melon. Come awujil ma'anic toj bʌ winic.

³ Come jini j contra tsa'ix i yajñesayon. Tsa'ix i t'uchtayon jubel ti lum. Tsi' yotsayon ti ic'yoch'an bʌ pañimil che' bajche' i mal mucoñibʌl.

⁴ Jini cha'an c'uñon cha'an ch'ijiyem c pusic'al. Mi' toj sajtel c pusic'al.

⁵ Mic ña'tan bajche' tsac ñusa q'uin ti yambʌ ora. Mic ña'tan i ye'tel a c'ʌb. Mi cʌc' tic pusic'al pejtel a melbal.

⁶ Mic letsan j c'ʌb ya' ba' añet. Comet ti pejtelel c pusic'al che' bajche' yom ja' jini tiquin lum.

⁷ Jac'beñon ti ora, c Yum, come c'unix c pusic'al. Mach a mʌybeñon a wut, Ame lajalic mic sujtel bajche' jini mu' bʌ i jubelob ochel ti ch'en.

⁸ Che' mi' sʌc'an pañimil, la' c ña'tan c'ux ma' wubiñon, Come wolic ñopet. Cʌntesañon baqui a wom mic majlel, Come mi cʌc' c bʌ ti a wenta.

⁹ C Yum, pʌyʌyon loq'uel ti' tojlel jini j contrajob. Ti ajñel mic cha'len puts'el c'ʌlʌl ba' añet cha'an ma' cʌntañon.

¹⁰ Cʌntesañon chuqui a wom mic mel, come c Dioset. La' i pʌyon majlel ti toj bʌ bij a wEspíritu come jiñʌch wen bʌ.

¹¹ Cha'an i ñuclel a c'aba', c Yum, ch'ejlesañon. Pʌyʌyon loq'uel ti wocol ti toj bʌ a pusic'al.

¹² Jisan j contrajob come c'ux ma' wubiñon. Jisan pejtel mu' bʌ i tic'lañoñob, come a winicon.