Salmos 141 - Chol: I T’an Dios

Ma'anix mi' jac' mulil

¹ C Yum, wolic pejcañet. La' ti ora ba' añon. Ñich'tʌbeñon c t'an che' mic pejcañet.

² La' letsic jini coración ba' añet che' bajche' i buts'il pom. Yom ma' q'uelon che' mic letsan j c'ʌb i wentajʌch a majtan che' ti ic'ajel.

³ C Yum, cʌntʌbeñon quej. Aq'ueñon c wen ña'tan ba' ora mʌcʌl yom.

⁴ Mach a cʌyon ame mi cʌc' c pusic'al ti jontolil. Cʌntañon ame mic mel chuqui jisil yic'ot winicob mu' bʌ i melob jontolil. Come mi' mulañob i xujch' che' bajche' sumuc tac bʌ i bʌl i ñʌc'.

⁵ La' i tic'on jini toj bʌ winic anquese c'ux i t'an. Uts'at mi caj i coltañon. Lajalʌch bajche' xojocña bʌ aceite cha'an c jol, mu' bʌ c mulan. Mi caj c ña'tan ti oración j contrajob yic'ot i jontolil.

⁶ Che' mi' chojquelob jubel ti panch'en jini jontol bʌ yumʌlob mu' bʌ i cha'leñob meloñel, Jini winicob x'ixicob mi caj i ña'tañob isujm c t'an.

⁷ Che' bajche' mi' choc lum jini mu' bʌ i pic majlel, Che' ja'el tsa' pam pujqui lac bʌquel ya' ti' ti' mucoñibʌl.

⁸ Wolic pijtañet c Yum Dios. Ti ajñel mic majlel ba' añet. Mach a cʌyon.

⁹ Cʌntañon ame chujquicon ti yac tsa' bʌ i yʌc'ʌyob xjontolilob.

¹⁰ La' tem yajlicob jini jontolo' bʌ ti jini jach bʌ yac tsa' bʌ i lon ac'ʌyob. Pero la' ñumicon ti uts'at.