Salmos 140 - Chol: I T’an Dios

Ti mucul jach woli' chijtañob

¹ C Yum, pʌyʌyon loq'uel ti' c'ʌb jini jontol bʌ winicob. Coltañon loq'uel ti' p'ʌtʌlel jini yomo' bʌ i t'uchtañon.

² Mi' wʌn ña'tañob bajche' mi caj i melob jontolil. Ma'anic mi' cʌyob i tech guerra.

³ C'ux i yej che' bajche' i yej lucum. An i venenojlel i yej yilal.

⁴ C Yum, mach ma' cʌyon ti' tojlel ili jontolo' bʌ. Loc'sañon ti' tojlel jini mich'o' bʌ Tsa' bʌ i comol ña'tayob i yʌc'on ti yajlel.

⁵ Jini mu' bʌ i chañ'esañob i bʌ tsi' yʌc'ʌyob yac ba' mach tsiquilic. Xotbilix chij ya' ba' mic ñumel ti bij. Chajpʌbilix yac cha'an mi' chucoñob.

⁶ Tsac sube c Yum: C Dios, C Yum, ñich'tañon che' mic pejcañet ti wocol t'an.

⁷ C Yum Dios, caj coltayajet. Cabʌl a p'ʌtʌlel. Tsa' cʌntayon che' ti yorajlel guerra.

⁸ C Yum, mach a wʌq'ueñob chuqui yomob jini jontolo' bʌ. Mach yomic mi' loq'uel ti uts'at chuqui mi' ña'tañob i mel Ame ch'ejl'acob ti jontolil.

⁹ Jini mu' bʌ i joyoñob mi' chañ'esañob i bʌ. La' sujtic ti' tojlelob jini jontolil tsa' bʌ i meleyob.

¹⁰ La' yajlic i nich c'ajc ti' jol che' woli ti lejmel. La' chojquicob ochel ti c'ajc. La' chojquicob ochel ti tam bʌ ch'en ba' mach mejlicob ti loq'uel.

¹¹ La' jilicob jini mu' bʌ i cha'lenob p'ajoñel cha'an ma'anic mi' chʌn p'ojlelob. La' i bʌc' taj wocol jini winic yujil bʌ jontolil.

¹² Cujil cʌntʌbil i cha'an lac Yum jini tic'lʌbilo' bʌ. Woli' coltañob. Mi caj i tsictesʌbeñob toj bʌ i pusic'al jini p'ump'uño' bʌ.

¹³ Melel, jini tojo' bʌ mi caj i subob i ñuclel a c'aba'. Jini tojo' bʌ mi caj i chumtʌlob ti a tojlel.