Salmos 14 - Chol: I T’an Dios

I jontolil winicob

¹ Jini tontojo' bʌ mi' lon alob ti' pusic'al: Ma'anic Dios, che'ob. Sojquemob jax, leco jax i melbalob. Ma'anic mi juntiquilic mu' bʌ i mel chuqui uts'at.

² Lac Yum am bʌ ti panchan mi' q'uel winicob x'ixicob. Woli' q'uel mi an majch mi' ch'ʌmben isujm, Mi an majch mi' sajcan Dios.

³ Ti pejtelelob tsa'ix i sʌtʌyob i bʌ, Tsa'ix i cha'leyob mulil. Ma'anic majqui mi' mel chuqui uts'at, mi juntiquilic.

⁴ ¿Mach ba junlajalobic jini mu' bʌ i cha'leñob jontolil? Ma'anic mi' ch'ʌmbeñob isujm. Mi' jisañob i winicob Dios che' bajche' mi' c'uxob i waj. Ma'anic mi' c'ajtiñob i coltʌntel ti Dios.

⁵ Tsa' cajiyob ti cabʌl bʌq'uen, Come ya' mi yajñel Dios yic'ot jini tojo' bʌ.

⁶ Jatetla tsa' la' ña'ta la' wʌc' ti quisin jini p'ump'un bʌ, Pero tsi' taja i coltʌntel ti lac Yum.

⁷ Uts'atax muq'uiquix i bʌc' tejchel i coltʌntel israelob ya' ti Sion. Lac Yum mi caj i cha' pʌy loq'uel i cha'año' bʌ ya' ba' ñup'ulob Cha'an mi' tajob i tijicñʌyel israelob.