Salmos 137 - Chol: I T’an Dios

Ch'ijiyemob israelob año' bʌ ti Babilonia

¹ Ya' ti Babilonia tsa' buchleyonla ya' ti' ti' colem ja'. Tsa' lac cha'le uq'uel che' bʌ tsa' lac ña'ta Sion.

² Ya' ti te' tsa' lac joc'choco jini arpa lac cha'an.

³ Laj contrajob tsi' wersa subeyonla cha'an mi lac cha'len c'ay. Tijicñayob i pusic'al tsi' tic'layonla. Tsi' yʌlʌyob: C'ʌyibeñon lojon c'ay che' bajche' ti Sion, che'ob.

⁴ ¿Mejl ba lac cha'len c'ay cha'an lac Yum ya' ti' lumal jini mach bʌ laj cʌñʌyobic?

⁵ Mi tsa' ñajʌyi Jerusalén ti lac pusic'al La' jʌmlec jini ñoj bʌ laj c'ʌb.

⁶ Mi ma'anic mi lac chʌn c'ajtesañet, La' i lʌp' i bʌ la cac' ti mal la quej. Ñumen la com sʌclʌben i wenlel Jerusalén bajche' i tijicñʌyel lac pusic'al.

⁷ C Yum, ña'tʌbeñob i mul jini edomob tsa' bʌ i contrajiyob Jerusalén che' woli ti wocol. Tsi' yʌlʌyob: Jisanla, jisanla c'ʌlʌl ti' c'ʌclib tac, che'ob.

⁸ Babilonia, wen awujil jisaya. Tijicña jini mu' bʌ i yʌq'ueñet a toj chuqui tac tsa' melbeyon lojon.

⁹ Tijicña jini mu' bʌ i chuc a walobilob cha'an mi' pajq'uiñob ti xajlel.