Salmos 136 - Chol: I T’an Dios

Ti' pejtelel ora an i yutslel lac Yum

¹ Subenla wocolix i yʌlʌ lac Yum, come uts'at i pusic'al. Come ti pejtelel ora an i yutslel i pusic'al.

² Aq'uenla wocolix i yʌlʌ Dios, jini cojach bʌ Dios, Come ti pejtelel ora an i yutslel i pusic'al.

³ Aq'uenla wocolix i yʌlʌ i Yum jini yumʌlob, Come ti pejtelel ora an i yutslel i pusic'al.

⁴ Jini mu' bʌ i bajñel mel jini ñuc tac bʌ i melbal, Come ti pejtelel ora an i yutslel i pusic'al.

⁵ Jini tsa' bʌ i mele panchan cha'an cabʌl i ña'tʌbal, Come ti pejtelel ora an i yutslel i pusic'al.

⁶ Jini tsa' bʌ i yʌc'ʌ ti tsictiyel lum ya' ti ja', Come ti pejtelel ora an i yutslel i pusic'al.

⁷ Jini tsa' bʌ i mele q'uin yic'ot uw, Come ti pejtelel ora an i yutslel i pusic'al.

⁸ Jini q'uin cha'an mi' pʌs i c'ʌc'al ti q'uiñil, Come ti pejtelel ora an i yutslel i pusic'al.

⁹ Jini uw yic'ot ec' tac cha'an mi' pʌsob i c'ʌc'al ti ac'ʌlel, Come ti pejtelel ora an i yutslel i pusic'al.

¹⁰ Suben wocolix i yʌlʌ Dios tsa' bʌ i jisa jini ascuñʌlo' bʌ ti Egipto, Come ti pejtelel ora an i yutslel i pusic'al.

¹¹ Tsi' pʌyʌ loq'uel israelob ya' ba' cʌchʌlob, Come ti pejtelel ora an i yutslel i pusic'al.

¹² Tsi' loc'sayob ti' tojlel i contrajob ti p'ʌtʌl bʌ i c'ʌb. Come ti pejtelel ora an i yutslel i pusic'al.

¹³ Jiñʌch tsa' bʌ i cala ti ojlil jini Chʌchʌc bʌ Ñajb, Come ti pejtelel ora an i yutslel i pusic'al.

¹⁴ Tsi' pʌyʌ c'axel israelob ti yojlil, Come ti pejtelel ora an i yutslel i pusic'al.

¹⁵ Tsi' choco ochel Faraón yic'ot i soldadojob ya' ti ojlil Chʌchʌc bʌ Ñajb, Come ti pejtelel ora an i yutslel i pusic'al.

¹⁶ Tsi' c'axtesa i cha'año' bʌ ti jochol bʌ lum, Come ti pejtelel ora an i yutslel i pusic'al.

¹⁷ Tsi' jisa p'ʌtʌl bʌ yumʌlob, Come ti pejtelel ora an i yutslel i pusic'al.

¹⁸ Tsi' tsʌnsa ñuc bʌ yumʌlob, Come ti pejtelel ora an i yutslel i pusic'al.

¹⁹ Sehón i rey amorreojob, Come ti pejtelel ora an i yutslel i pusic'al.

²⁰ Yic'ot Og jini rey am bʌ ti Basán, Come ti pejtelel ora an i yutslel i pusic'al.

²¹ Tsi' yʌq'ueyob i lum jini israelob cha'an mi' yochelob ti' yum, Come ti pejtelel ora an i yutslel i pusic'al.

²² Chejachi tsi' yʌq'ueyob i lum jini israelob come i winicob Dios, Come ti pejtelel ora an i yutslel i pusic'al.

²³ Tsi' ña'tayonla che' ju'sʌbilix lac pusic'al, Come ti pejtelel ora an i yutslel i pusic'al.

²⁴ Tsi' mʌñʌyonla loq'uel ti' p'ʌtʌlel laj contrajob, Come ti pejtelel ora an i yutslel i pusic'al.

²⁵ Mi' yʌq'ueñob i bʌl i ñʌc' pejtel winicob x'ixicob, Yic'ot pejtel cuxul tac bʌ, Come ti pejtelel ora an i yutslel i pusic'al.

²⁶ Subenla wocolix i yʌlʌ Dios am bʌ ti panchan Come ti pejtelel ora an i yutslel i pusic'al.