Salmos 132 - Chol: I T’an Dios

I chumlib Dios

¹ C Yum, ña'tʌben pejtelel i wocol David.

² Tsi' yʌq'ueyet i t'an. Tsi' wa'choco i t'an ti' tojlel jini p'ʌtʌl bʌ Dios, i Dios Jacob.

³ Isujm ma'anic mi caj cochel ti cotot, che'en. Ma'anic mi caj c ñoltʌl tic ch'ac.

⁴ Ma'anic mi caj c cha'len wʌyel, Ma'anic mi caj c muts' c wut,

⁵ Jinto mic tajben i yajñib lac Yum, I chumlib jini p'ʌtʌl bʌ i Dios Jacob, che'en.

⁶ Awilan, tsa cubi lojon ya'an jini Arca ti Efrata. Ti wi'il tsac taja lojon ya' ti te'el.

⁷ Conla ti' chumlib Dios. La' lac ch'ujutesan ya' ba'an i t'uchlib i yoc.

⁸ C Yum, yom ma' wa'tʌl. La' ti chumtʌl ba' mi' mejlel a c'aj a wo Yic'ot jini Arca ba' ma' tsictesan a ñuclel.

⁹ La' toj'acob i pusic'al jini motomajob a cha'an. La' i chajpañob i yespíritu che' bajche' mi' lʌpob i pislel. La' ñuc'acob i pusic'al a cha'año' bʌ. La' i tsictesañob i bʌ.

¹⁰ Mach ma' mʌyben a wut jini yajcʌbil bʌ a cha'an, Come c'ux ma' wubin a winic David.

¹¹ Lac Yum tsi' yʌq'ue David i t'an mu' bʌ caj i ts'ʌctiyel, xuc'ul bʌ ti pejtelel ora: Ya' ba' buchulet ti a yumʌntel mi caj c buchchocon juntiquil a p'olbal.

¹² Mi xuc'ul mi' jac'ob jini trato bʌ c t'an a walobilob, Mi xuc'ul mi' jac'ob c t'an mu' bʌ caj j cʌntesañob, Mi caj i cha'leñob yumʌl ti a buchlib ti pejtelel ora, che'en lac Yum.

¹³ Come lac Yum tsi' yajca Sion jini ch'ujul bʌ tejclum Cha'an ya' yom chumtʌl.

¹⁴ Tsi' yʌlʌ lac Yum: Jiñʌch cajñib ti pejtelel ora ba' mi caj j c'aj co. Wʌ' mi caj c chumtʌl cha'an che' yom c pusic'al.

¹⁵ Mi caj c wen p'ojlesʌbeñob i bʌl i ñʌc' jini wʌ' bʌ chumulob. Mi caj c wen aq'ueñob i waj jini p'ump'uño' bʌ.

¹⁶ Mi caj j coltan i motomajob. Jini ch'ujulo' bʌ ju'ucñayob mi' cajelob ti t'an cha'an i tijicñʌyel i pusic'al.

¹⁷ Mi caj c p'ojlesʌben i p'ʌtʌlel David yic'ot i p'olbal. Mi caj cʌq'uen ñuc bʌ i ye'tel che' bajche' lámpara mach bʌ yujilic yajpel, jini yajcʌbil bʌ c cha'an.

¹⁸ Mi caj cʌc' ti quisin i contrajob. Pero wen ñuc mi caj i q'uejlel jini Rey ti' yumʌntel. Che' tsi' yʌlʌ lac Yum.