Salmos 129 - Chol: I T’an Dios

La' i tojob i mul i contrajob Sion

¹ Cabʌl tsi' tic'layoñob c'ʌlʌl che' ch'itoñon to, La' i yʌlob israelob ti junjuntiquil.

² Anquese cabʌl tsi' tic'layoñob c'ʌlʌl che' ch'itoñon to, Ma'anic tsa' mʌjli i cha'añob.

³ Jini xpic lumob tsi' piquiyob c pat yubil yic'ot asiyal. Tam tac tsi' lowoyoñob, che'ob.

⁴ Toj lac Yum. Tsa'ix i yʌc'ʌ ti bic'ti ts'ojquel i lazo jini jontolo' bʌ cha'an mij colel.

⁵ La' i yubiñob quisin. La' i tʌts'ob i bʌ Pejtel mu' bʌ i ts'a'leñob jini chumulo' bʌ ti Sion.

⁶ La' bʌc' jilicob che' bajche' jam mu' bʌ i pasel ti' jol otot, Mu' bʌ i tiquin ti q'uin.

⁷ Jini stsep jam mi' to'o ñumel, jochol i c'ʌb, Ma'anic chuqui mi' set cʌch majlel.

⁸ Jini xñumelob ma'anic mi' subeñob: La' i yʌq'ueñet i yutslel lac Yum, Mi cʌq'ueñet lojon i yutslel lac Yum, mach che'icob.