Salmos 128 - Chol: I T’an Dios

Tijicña jini winic mu' bʌ i bʌc'ñan lac Yum

¹ Tijicñayob pejtel mu' bʌ i bʌc'ñañob lac Yum, Mu' bʌ i cha'leñob xʌmbal ti' bijlel.

² Mi caj a c'ux waj cha'an ti a we'tel. Tijicña a pusic'al mi caj a wajñel. Mi caj a taj chuqui tac wen.

³ Lajal a wijñam ti a wotot bajche' ac' mu' bʌ i yʌc' i wut. Lajal a walobilob ti' joytilel a mesa bajche' i wut olivote'.

⁴ Isujm, che'ʌch mi caj i yʌq'uentel i wenlel jini winic mu' bʌ i bʌc'ñan lac Yum.

⁵ La' i yʌq'ueñet lac Yum i yutslel i t'an loq'uem bʌ ti Sion. La' i yʌq'ueñet a q'uel i tijicñʌyel Jerusalén pejtel a jabilel.

⁶ La' i yʌq'ueñet a q'uel i yalobilob a walobilob. La' i tajob i ñʌch'tilel i pusic'al jini israelob.