Salmos 120 - Chol: I T’an Dios

I jilibal jini xlotob

¹ Che' bʌ tsa cubi wocol tsac pejca c Yum, tsi' jac'beyon.

² La' i loc'sañon c Yum ti' tojlel jini mu' bʌ i cha'leñob lot, Yic'ot ti' tojlel mu' bʌ i lotiñob i pi'ʌlob.

³ Mi awujil lot, ¿bajche' mi caj a wujtel? ¿Chuqui to yom ma' melbentel?

⁴ Mi caj a jejq'uel ti' te'el jalʌjb am bʌ ti' c'ʌb jini p'ʌtʌl bʌ. Mi caj i pulet a bʌc woli bʌ ti lejmel.

⁵ Obol c bʌ, come chumulon ti' yojlil jini jontolo' bʌ. Sajtemob che' bajche' jini chumulo' bʌ ti Mesec yic'ot Cedar.

⁶ Wen jal tsa' chumleyon yic'ot jini mu' bʌ i ts'a'leñob ñʌch'ʌl bʌ lac pusic'al.

⁷ Com mi' lajmel leto cha'an mi lac taj i ñʌch'tilel lac pusic'al, Pero anquese mic pejcañob ti' yutslel c t'an, chʌn yomob guerra.