Salmos 118 - Chol: I T’an Dios

Wocolix i yʌlʌ lac Yum mu' bʌ i coltañonla

¹ Aq'uenla wocolix i yʌlʌ lac Yum, come uts'at lac Yum. Ti pejtelel ora an i yutslel i pusic'al.

² La' i yʌlob jini israelob: Ti pejtelel ora an i yutslel i pusic'al.

³ La' i yʌlob i yalobilob Aarón: Ti pejtel ora an i yutslel i pusic'al.

⁴ La' i yʌlob jini mu' bʌ i ch'ujutesañob lac Yum: Ti pejtelel ora an i yutslel i pusic'al.

⁵ Che' bʌ tsa cubi wocol tsac pejca lac Yum. Tsi' jac'beyon, tsi' yʌc'ʌyon ti colel.

⁶ Lac Yum an quic'ot. Ma'anic mi caj c bʌc'ñan chuqui mi' tumbeñoñob winicob.

⁷ Lac Yum mi' yajñel quic'ot. Mi' yʌq'ueñon c p'ʌtʌlel. Mi caj j q'uel i jilibal jini mu' bʌ i ts'a'leñon.

⁸ Yom mi lac xuc'chocon lac pusic'al yic'ot lac Yum. Mach yomic mi la cʌc' lac pusic'al yic'ot winicob.

⁹ Yom mi lac xuc'chocon lac pusic'al ti' wenta lac Yum. Mach yomic mi la cʌc' lac pusic'al ti' wenta yumʌlob.

¹⁰ Jini sajtemo' bʌ ti jujumpejt tejclum tsi' joyoyoñob. Tsac t'uchtayob ti' c'aba' lac Yum.

¹¹ Tsi' joyoyoñob. Isujm, joyolon i cha'añob, Pero tsac t'uchtayob ti' c'aba' lac Yum.

¹² Jomjomñayob tic t'ejl che' bajche' i chʌñil chab. Colel i pulon che' bajche' ch'ix woli bʌ ti lejmel tic joytilel. Ti' c'aba' c Yum tsac bajbeyob jubel.

¹³ Wen ñet'elon, colel c yajlel, Pero lac Yum tsi' loc'sayon.

¹⁴ Lac Yum c p'ʌtʌlelʌch. Jiñʌch mu' bʌ j c'ʌyin. Jiñʌch xcoltaya c cha'an.

¹⁵ Ubinla jini tijicña bʌ t'an ti' chumlib jini tojo' bʌ Come tsa' mʌjliyob i cha'an ti' p'ʌtʌlel lac Yum.

¹⁶ Wen ñuc i p'ʌtʌlel lac Yum. Cha'an ti' p'ʌtʌlel lac Yum mi' mʌjlel lac cha'an.

¹⁷ Ma'anic mi caj c chʌmel. Mi caj j cuxtiyel. Mi caj c sub i melbal lac Yum.

¹⁸ Lac Yum tsi' wen ju'sʌbeyon c pusic'al ti wocol, Pero ma'anic tsi' yʌc'ʌyon ti chʌmel.

¹⁹ Jambeñon i puertajlel Templo ya' ba' mi' yochelob jini tojo' bʌ, Cha'an mi cochel cʌq'uen wocolix i yʌlʌ lac Yum.

²⁰ Jiñʌch i puertajlel lac Yum ba' mi' cajelob ti ochel jini tojo' bʌ.

²¹ Mic subeñet wocolix a wʌlʌ come tsa' jac'beyon. Tsa' ochiyet ti caj coltaya.

²² Jini xajlel ts'a'lebil bʌ i cha'an xmel ototob Tsa'ix otsʌnti ti' xujc otot.

²³ Jiñʌch i melbal lac Yum. Uts'atax mi laj q'uel.

²⁴ Ili tsic i melbalʌch lac Yum. La' la cubin tijicña. Yom tijicña mi laj q'uel.

²⁵ C Yum, awocolic, coltañon lojon. Awocolic c Yum, la' loq'uic ti uts'at chuqui mic mel lojon.

²⁶ Tijicña jini mu' bʌ i tilel ti' c'aba' lac Yum. Wʌ' ti a wotot, c Yum, mi cʌq'ueñet lojon i yutslel c t'an.

²⁷ Jiñʌch Dios lac Yum. Tsi' yʌc'ʌ i sʌclel pañimil ti lac pusic'al. Cʌchʌla jini tsʌnsʌbil bʌ i majtan ti ch'ajan wʌ' ti' xulub pulʌntib.

²⁸ Jatet c Dioset, mi caj c subeñet wocolix a wʌlʌ. C Dios, mi caj c pʌs a ñuclel.

²⁹ Subenla wocolix i yʌlʌ lac Yum, come uts'at lac Yum. Ti pejtelel ora an i yutslel i pusic'al.