Salmos 116 - Chol: I T’an Dios

Wocolix i yʌlʌ Dios cha'an ma'anic tsa' chʌmi

¹ Mij c'uxbin c Yum come tsi' yubibeyon coración che' bʌ tsac pejca ti wocol t'an.

² Mi' yubibeñon coración. Jini cha'an mi caj c chʌn pejcan che' cuxulon to.

³ Colelix c chʌmel, tsa' cʌn jujch'iyon. Tsac cha'le bajq'uel che' bajche' jini woliyo' bʌ ti chʌmel. Cabʌl tsa cubi wocol, ch'ijiyem jax c pusic'al.

⁴ Tsa' caji c pejcan lac Yum ti' c'aba'. Awocolic c Yum, coltañon.

⁵ Uts lac Yum, toj ja'el. Mi' p'untañonla lac Dios.

⁶ Lac Yum mi' cʌntan jini p'ump'uño' bʌ. Che' an cabʌl c tic'lʌntel tsi' coltayon.

⁷ La' sujticon ti pejtelel c pusic'al ba' mij c'aj co, Come c Yum tsi' wen pʌsbeyon i yutslel.

⁸ Tsa' loc'sayon ba' colel c chʌmel, Tsa' sujcubeyon i ya'lel c wut. Tsa' p'ʌtesa coc che' colel c yajlel.

⁹ Mi caj cajñel ti' tojlel lac Yum che' cuxulon to wʌ' ti pañimil.

¹⁰ Ba' ora woliyon ti cabʌl wocol tsac chʌn ñopo Dios.

¹¹ Tsa cʌlʌ xlotob pejtel winicob, Come tsac lon ña'ta mach lajmicon.

¹² ¿Pero wʌle chuqui mi mejlel cʌq'uen lac Yum Cha'an pejtelel i yutslel tsa' bʌ i pʌsbeyon?

¹³ Mi caj c ch'ʌm jini taza i yejtalʌch j coltʌntel. Mi caj c pejcan c Yum, come p'ʌtʌl i c'aba'.

¹⁴ Ya' ti' tojlel i cha'ano' bʌ Mi caj c ts'ʌctesan c t'an tsa' bʌ c sube c Yum.

¹⁵ Lac Yum mi' wen p'untan i cha'ano' bʌ che' mi' chʌmelob.

¹⁶ C Yum, a winicon. Mi caj c yumañet come tsa' jitiyon.

¹⁷ Mi caj c subeñet wocolix a wʌlʌ che' mi cʌq'ueñet tsʌnsʌbil bʌ a majtan. Mi caj c pejcañet ti a c'aba'.

¹⁸ Ya' ti' tojlel pejtel i cha'año' bʌ Mi caj c ts'ʌctesan c t'an tsa' bʌ c sube c Yum

¹⁹ Ya' ti' pam i yotot lac Yum, ti' yojlil Jerusalén. ¡Aleluya!