Salmos 115 - Chol: I T’an Dios

Dios yic'ot dioste' tac

¹ Tsictesan i ñuclel a c'aba', c Yum, Mach cha'anic mij q'uejlel lojon ti ñuc, pero cha'an ma' q'uejlel ti ñuc. Cha'an cabʌl a c'uxbiya, wen xuc'ulet.

² ¿Chucoch mi' lon alob jini sajtemo' bʌ: ¿Bacan tsiquil i Dios? che'ob?

³ Ya'ʌch an lac Dios ti panchan. Mi' mel chuqui jach yom i pusic'al.

⁴ I diostac sajtemo' bʌ, i melbalob jach winicob. Mi' melob ti sʌsʌc taq'uin yic'ot c'ʌnc'ʌn taq'uin.

⁵ An i yej, pero mach yujilic t'an. Canal i wut, pero ma'anic chuqui mi' q'uel.

⁶ An i chiquin, pero ma'anic mi' yubin t'an. An i ñi', pero ma'anic chuqui mi' sic'.

⁷ An i c'ʌb, pero ma'anic mi' ñijcan. An i yoc, pero mach yujilic xʌmbal. Ma'anic mi' loq'uel t'an ti' bic'.

⁸ Pejtel mu' bʌ i melob dioste', mu' bʌ i ñopob, junlajalob yic'ot.

⁹ Jatetla, israelob, ñopola lac Yum. Jiñʌch la' p'ʌtʌlel, jiñʌch la' mʌctʌjib.

¹⁰ Jatetla i yalobilet bʌ la Aarón, ñopola lac Yum. Jiñʌch la' waj coltaya, la' mʌctʌjibʌch.

¹¹ Jatetla mu' bʌ la' bʌc'ñan lac Yum, ñopola lac Yum. Lac p'ʌtʌlelʌch, lac mʌctʌjibʌch.

¹² Woli' ña'tañonla lac Yum. Mi caj i yʌq'ueñonla i yutslel i t'an. Mi caj i yʌq'ueñob i yutslel i t'an israelob Yic'ot i yalobilob Aarón.

¹³ Lac Yum mi caj i yʌq'ueñob i yutslel i t'an jini mu' bʌ i c'uxbiñob, Jini ch'o'ch'oco' bʌ yic'ot jini ñuco' bʌ.

¹⁴ La' i p'ojlesañetla yic'ot la' walobilob.

¹⁵ Lac Yum tsa' bʌ i mele panchan yic'ot pañimil woli' yʌq'ueñetla i yutslel i t'an.

¹⁶ Lac Yum i yumʌch panchan. Pero tsi' yotsa pañimil ti' wenta winicob x'ixicob.

¹⁷ Jini chʌmeño' bʌ ma'anix mi' subob i ñuclel lac Yum wʌ' ti pañimil, come ñʌch'ʌlob ti mucoñibʌl.

¹⁸ Pero joñonla mi mejlel lac sub ti ñuc lac Yum wʌle yic'ot ti pejtelel ora. ¡Aleluya!