Salmos 114 - Chol: I T’an Dios

Ñuc bʌ i melbal Dios ti Egipto

¹ Che' bʌ tsa' loq'ui Israel ti Egipto, ti' tojlel egiptojob parte bʌ i t'an,

² Judá tsa' ochi ti' tejclum Dios. Ya' tsi' cha'le i yumʌntel Dios.

³ Jini ñajb tsi' q'uele yilal, tsa' puts'i majlel. Jini Jordán ja' tsa' cha' sujti.

⁴ Tsa' tijp'i majlel wits yilal, che' bajche' i tat chivo. Tsa' tijp'i majlel alʌ bujtʌl che' bajche' tiñʌme'.

⁵ ¿Chucoch tsa' puts'iyet ñajb? Jatet Jordán ja', ¿chucoch tsa' sujtiyet?

⁶ Jatet wits, ¿chucoch tsa' tijp'iyet che' bajche' i tat tiñʌme'? Jatet bujtʌl, ¿chucoch tsa' tijp'iyet che' bajche' alʌ tiñʌme'?

⁷ Jatet pañimil, yom tsiltsilñayet ti' tojlel lac Yum, ti' tojlel i Dios Jacob.

⁸ Jiñʌch tsa' bʌ i yʌc'ʌ ti loq'uel yʌx bʌ ja' ti xajlel. Tsi' yʌc'ʌ ti loq'uel cuxul bʌ ja' ti xajlel.