Salmos 112 - Chol: I T’an Dios

I wenlel mu' bʌ i bʌc'ñan lac Yum

¹ ¡Aleluya! Tijicña jini winic mu' bʌ i bʌc'ñan lac Yum, mu' bʌ i taj i tijicñʌyel i pusic'al cha'an i mandar.

² Ñuc mi caj i q'uejlelob i yalobilob ti' lumal. I yalobilob jini toj bʌ mi caj i yʌq'uentelob i yutslel i t'an Dios.

³ Wen chumul jini winic. An cabʌl i chubʌ'an ti' yotot. Mi caj i chʌn ña'tʌntel cha'an toj bʌ i melbal.

⁴ An i c'ajc che' mi' yic'an pañimil. Uts i pusic'al jini toj bʌ yujil bʌ p'untaya.

⁵ An i wenlel jini mu' bʌ i p'ew i chubʌ'an, mu' bʌ i yʌc' ti majan i chubʌ'an, mu' bʌ i mel i ye'tel ti toj.

⁶ Jini winic mi caj i cʌntʌntel ti' yorajlel wocol. Mi caj i chʌn ña'tʌntel ti pejtelel ora.

⁷ Ma'anic mi' bʌc'ñan jini bʌbʌq'uen bʌ mi' tilel. Come xuc'ul i pusic'al woli' wen ñop lac Yum.

⁸ Ñuc i pusic'al, ma'anic mi' caj ti bʌq'uen ti' tojlel i contrajob.

⁹ Mi' wen p'ew i chubʌ'an. Mi' t'oxbeñob jini p'ump'uño' bʌ. Toj mi' yajñel ti pejtelel ora. Mi caj i yʌq'uentel ñuc bʌ i ye'tel yic'ot i c'uxbintel.

¹⁰ Jini xjontolil mi caj i mel i pusic'al che' mi' q'uel. Mich' mi caj i q'uel, tsʌytsʌña jax i pusic'al, pero mi caj i sʌc jilel. Jini jontolo' bʌ ma'anic mi caj i tajob chuqui tac yomob.