Salmos 111 - Chol: I T’an Dios

Dios mi' cʌntan i cha'año' bʌ

¹ ¡Aleluya! Ti pejtelel c pusic'al mic suben wocolix i yʌlʌ lac Yum ti' tojlel jini tojo' bʌ mu' bʌ i tempañob i bʌ.

² Wen ñuc i melbal lac Yum ti' tojlel pejtel mu' bʌ i cʌñob Mu' bʌ i tajob i tijicñʌyel i pusic'al cha'an i ye'tel.

³ Ti pejtelel i melbal mi laj q'uel i ñuclel i yumʌntel. Toj mi' yajñel ti pejtelel ora.

⁴ Tsi' yʌc'ʌ ti chʌn ña'tʌntel jini ñuc tac bʌ i melbal. Uts lac Yum, mi' p'untañonla.

⁵ Mi' we'san jini mu' bʌ i bʌc'ñañob. Ti pejtelel ora mi' ña'tan jini xuc'ul bʌ i t'an.

⁶ Tsi' tsictesa i p'ʌtʌlel ti' tojlel i cha'año' bʌ. Tsi' chilbeyob i lum jini sajtemo' bʌ cha'an mi' yʌq'ueñob.

⁷ Xuc'ul pejtel i melbal, toj ja'el. Isujm pejtel i cʌntesa.

⁸ Xuc'chocobil i t'an ti pejtelel ora. Mi' laj ts'ʌctiyel cha'an i xuc'tilel i pusic'al yic'ot i tojel.

⁹ Lac Yum tsi' mʌñʌ i cha'año' bʌ. Tsi' yʌc'ʌ xuc'ul bʌ i t'an mu' bʌ i yajñel ti pejtelel ora. Ch'ujul i c'aba', bʌc'ñʌbil ja'el.

¹⁰ Jiñʌch i cajibal lac ña'tʌbal che' mi lac bʌc'ñan lac Yum. Mi' wen ña'tañob pañimil pejtel mu' bʌ i jac'beñob i mandar. Mux i sujbel i ñuclel lac Yum ti pejtelel ora.