Salmos 107 - Chol: I T’an Dios

Dios mi' loc'san ti wocol

LIBRO V

¹ Subenla wocolix i yʌlʌ lac Yum, come uts'at lac Yum, Come mach jilic i yutslel ti pejtelel ora.

² La' i yʌlob jini mʌmbilo' bʌ i cha'an lac Yum, tsa' bʌ loq'uiyob ti' c'ʌb i contra.

³ Tsi' tempayob tilel Loq'uemo' bʌ ba' mi' pasel q'uin, yic'ot ba' mi' bʌjlel q'uin, yic'ot ti norte, yic'ot ti sur.

⁴ Tsi' pam cha'leyob ñumel xʌmbal ti jochol bʌ lum. Ma'anic tsi' tajayob ba' mi' cha'leñob chumtʌl.

⁵ Cabʌl tsi' yubiyob wi'ñal yic'ot tiquin ti'. P'ump'uñob tsi' yubiyob.

⁶ Che' woliyob ti wocol tsi' pejcayob lac Yum ti wocol t'an. Jini tsi' pʌyʌyob loq'uel ti wocol.

⁷ Tsi' pʌyʌyob majlel ti toj bʌ bij Cha'an mi' tajob tejclum ba' uts'at mi' chumtʌlob.

⁸ La' lac suben wocolix i yʌlʌ lac Yum cha'an i yutslel, Cha'an ñuc bʌ i melbal mu' bʌ i pʌsbeñonla.

⁹ Come mi' yʌq'uen ja' jini am bʌ i tiquin ti'. Mi' yʌq'uen chuqui uts'at jini am bʌ i wi'ñal cha'an mi' tijicñesʌben i ch'ujlel.

¹⁰ Lamital tsa' ajniyob ti ic'yoch'an bʌ pañimil ba' wen ch'ijiyem. Cʌchbilob ti cadena tac woliyob ti wocol

¹¹ Come tsi' ñusʌbeyob i mandar Dios. Tsi' ts'a'lebeyob i t'an jini C'ax Nuc Bʌ.

¹² Jini cha'an tsi' ju'sʌbeyob i pusic'al ti e'tel. Tsa' yajliyob. Ma'anic majqui tsi' coltayob.

¹³ Tsa' caji' pejcañob lac Yum ti wocol t'an che' woliyob ti wocol. Tsi' coltayob loq'uel ti wocol.

¹⁴ Tsi' pʌyʌyob loq'uel ti ic'yoch'an bʌ pañimil ba' bʌbʌq'uen mi' chʌmelob. Tsi' bic'ti ts'ocbeyob i cadena.

¹⁵ La' lac suben wocolix i yʌlʌ lac Yum cha'an i yutslel, Cha'an ñuc bʌ i melbal mu' bʌ i pʌsbeñonla.

¹⁶ Come tsi' jeme jini puerta tac melbil bʌ ti chʌchʌc taq'uin, Yic'ot jini bara tac melbil bʌ ti fierro.

¹⁷ Jini tontojo' bʌ mi' tajob wocol cha'an i jontolil. Tsa' aq'uentiyob wocol cha'an i mul.

¹⁸ Tsi' ts'a'leyob i bʌl i nʌc', colel i chʌmelob.

¹⁹ Che' woli' yubiñob wocol tsi' pejcayob lac Yum ti wocol t'an. Tsi' pʌyʌyob loq'uel ti' wocol.

²⁰ Lac Yum tsi' choco majlel i t'an cha'an mi' lajmesañob. Tsi' coltayob.

²¹ La' lac suben wocolix i yʌlʌ lac Yum cha'an i yutslel, Cha'an ñuc i melbal mu' bʌ i pʌsbeñonla.

²² La' la cʌq'uen Dios wocolix i yʌlʌ yic'ot tsʌnsʌbil bʌ i majtan. La' lac sub i melbal ti' tijicñʌyel lac pusic'al.

²³ Winicob mi' cha'leñob xʌmbal ti barco tac ya' ti colem ñajb Cha'an mi' cha'leñob mʌñoñel choñoñel ti ñajtʌl.

²⁴ Jini winicob mi' q'uelbeñob i melbal lac Yum, Jini ñuc tac bʌ i melbal ti tam bʌ ñajb.

²⁵ Mi' tejchel p'ʌtʌl bʌ ic' cha'an ti' mandar lac Yum. Mi' wec'ulan jini ja' c'ʌlʌl ti tocal.

²⁶ Wen chan mi' cha' jubel. Tsiltsilñayob ti bʌq'uen cha'an wocol.

²⁷ Ticlaw mechlawob tsi' meleyob i bʌ che' bajche' xyʌc'ajel. Tsa' toj sajtiyob i pusic'al.

²⁸ Che' woli' yubiñob wocol tsi' pejcayob lac Yum ti wocol t'an. Tsi' pʌyʌyob loq'uel ti wocol.

²⁹ Tsi' ñʌch'tesa jini p'ʌtʌl bʌ ic', tsa' lajmi. Tsi' tiq'ui jini wʌlwʌlña bʌ ja', tsa' ñʌjch'i.

³⁰ Tijicñayobix jini p'ump'uño' bʌ come ñʌch'ʌlix. Lac Yum tsi' pʌyʌyob majlel ba' yomob c'otel.

³¹ La' lac suben wocolix i yʌlʌ lac Yum cha'an i yutslel, Cha'an jini ñuc bʌ i melbal mu' bʌ i pʌsbeñonla.

³² La' lac ñuq'uesan Dios ti' tojlel jini tempʌbilo' bʌ come ñuc lac Yum. La' lac sub i ñuclel ti' tojlel jini año' bʌ i ye'tel.

³³ Dios mi' tiquesan jini colem ja'. Mi' sutq'uin ti tiquin lum ya' ba' tsa' ajni cuxul bʌ ja'.

³⁴ Mi' sutq'uin ti pujch'em bʌ lum jini wen bʌ lum, Cha'an i jontolil jini ya' bʌ chumulob.

³⁵ Mi' sutq'uin jini tiquin lum ti wen bʌ lum. Mi' yʌc' ti loq'uel cuxul bʌ ja' ti tiquin lum.

³⁶ Ya'i mi' yotsañob ti chumtʌl jini woli bʌ i yubiñob wi'ñal. Mi' wa'chocoñob tejclum ba' mi' chumtʌlob.

³⁷ Mi' pʌc'ob cholel yic'ot ts'usubil. Mi' tajob on bʌ i cuch i cholob.

³⁸ Mi' p'ojlelob cha'an ti' yutslel i t'an lac Yum. Ma'anic mi' to'ol chʌmel i wacax.

³⁹ Pero an i tajol mi' jilelob yic'ot wocol Che' mi' ju'sʌbentelob i pusic'al ti wocol yic'ot i ch'ijiyemlel.

⁴⁰ Dios mi' ts'a'len yumʌlob. Mi' yʌc'ob ti xʌmbal ñumel ti jochol lum ba' ma'anic bij.

⁴¹ Pero mi' loc'san ti wocol jini p'ump'uño' bʌ. Mi' melob ti ñuc. Mi' p'ojlesʌbeñob i yalobilob.

⁴² Jini tojo' bʌ winicob mi' caj i lu' ña'tañob iliyi. Mi' caj i ñuc'añob i pusic'al. Pejtelel mu' bʌ i cha'leñob jontolil mi caj i yubiñob quisin.

⁴³ Jini am bʌ i ña'tʌbal la' i ña'tan iliyi. Che' jini mux i ch'ʌmben isujm cabʌlʌchix i yutslel lac Yum.