Salmos 106 - Chol: I T’an Dios

Israel tsi' ñusʌbe i mandar lac Yum

¹ ¡Aleluya! Subenla wocolix i yʌlʌ lac Yum, come uts'atʌch. Come mach jilic i yutslel ti pejtelel ora.

² ¿Majqui yujil i subol jini ñuc tac bʌ i melbal lac Yum? ¿Majqui mi mejlel i pʌs pejtel i ñuclel?

³ Tijicñayob mu' bʌ i jac'ob chuqui toj, mu' bʌ i melob chuqui toj ti pejtelel ora.

⁴ Ña'tañon c Yum che' ma' pʌsbeñob i yutslel a cha'año' bʌ. Ña'tañon che' ma' coltañob

⁵ Cha'an mij q'uelben i wenlel jini yajcʌbilo' bʌ a cha'an, Cha'an tijicña mi cubin che' tijicñʌyob a cha'año' bʌ. Isujm tijicña c pusic'al quic'otob.

⁶ Tsa'ix lac cha'le mulil yic'ot lac tat, An lac mul, tsa' lac cha'le jontolil.

⁷ Che' ya' to añob lac tat ti Egipto ma'anic tsi' p'isiyob ti' wenta i p'ʌtʌlel Dios. Mach c'ajalic i cha'añob i yonlel i yutslel. Tsi' ñusʌbeyob i t'an lac Yum ya' ti Chʌchʌc bʌ Ñajb.

⁸ Pero tsi' coltayob cha'an mi' yʌc' ti cʌjñel i c'aba' yic'ot i p'ʌtʌlel.

⁹ Tsi' pejca jini Chʌchʌc bʌ Ñajb, tsa' tiqui. Tsi' pʌyʌyob ñumel ti tam bʌ ja' che' bajche' ti tiquin lum.

¹⁰ Tsi' coltayob loq'uel ti' p'ʌtʌlel jini tsa' bʌ i ts'a'leyob. Tsi' pʌyʌyob loq'uel ti' c'ʌb i contrajob.

¹¹ Jini ja' tsi' mujla i contrajob. Ma'anic majqui tsa' coli mi juntiquilic.

¹² Jini cha'an tsi' ñopbeyob i t'an, Tsi' c'ʌyibeyob i ñuclel.

¹³ Pero ti ora tsa' ñajʌyi ti' pusic'al i melbal. Ma'anic tsi' pijtayob i toj'esʌntel ti Dios.

¹⁴ Tsi' wersa c'ajtibeyob Dios chuqui yomob i c'ux. Tsi' yilʌbeyob i pusic'al ya' ti jochol bʌ lum.

¹⁵ Dios tsi' yʌq'ueyob chuqui tsi' c'ajtibeyob, Pero tsi' chocbeyob tilel i c'amʌjel tsa' bʌ i jisayob.

¹⁶ Tsʌytsʌyñayob i pusic'al winicob ti' tojlel Moisés Yic'ot ti' tojlel Aarón jini ch'ujul bʌ i winic lac Yum.

¹⁷ Jini cha'an tsa' tili i yujquel lum. Tsa' tsijli jini lum. Tsi' ñet'e cʌytʌl Datán. Tsi' mujla cʌytʌl Abiram yic'ot i pi'ʌlob.

¹⁸ Tsa' lejmi c'ajc ti' tojlel. Tsi' pulu jini jontolo' bʌ.

¹⁹ Tsi' meleyob alʌ tat wacax ya' ti Horeb. Tsi' ch'ujutesayob jini dioste' melbil bʌ ti c'ʌnc'ʌn taq'uin.

²⁰ Tsi' cʌyʌyob jini ñuc bʌ Dios cha'an mi' ch'ujutesañob i yejtal wacax yujil bʌ i c'uxol jam.

²¹ Tsa' ñajʌyiyob i cha'an Dios, jini i Yaj Coltaya Tsa' bʌ i pʌsʌ ñuc tac bʌ i melbal ya' ti Egipto.

²² Tsi' pʌsʌ cabʌl i yejtal i p'ʌtʌlel ya' ti' lumal Cam, Yic'ot bʌbʌq'uen tac bʌ ya' ti Chʌchʌc bʌ Ñajb.

²³ Dios tsi' sube Moisés mi caj i jisañob. Machic tsi' mʌcta Moisés tsa' laj jiliyob. Pero ya' ti' tojel i wut Dios tsa' wa'le Moisés jini yajcʌbil bʌ i cha'an, cha'an mi' mʌctʌben i mich'ajel.

²⁴ Tsi' chʌn cha'leyob mulil. Tsi' ts'a'leyob jini uts'at bʌ lum. Ma'anic tsi' ñopbeyob i t'an tsa' bʌ i subeyob cha'an jini lum.

²⁵ Tsi' cha'leyob wulwul t'an ti' yototob. Ma'anic tsi' jac'beyob i t'an lac Yum.

²⁶ Jini cha'an Dios tsi' wersa ac'ʌ i t'an Cha'an mi caj i jisañob ti jochol bʌ lum.

²⁷ Mi caj i pucbeñob majlel i p'olbal ti' tojlel sajtemo' bʌ Cha'an mi' pam pujquelob ti selol pañimil.

²⁸ Tsi' chʌn cha'leyob mulil. Tsi' tsajcayob jini dioste' i c'aba' Baal ya' ti Peor. Tsi' c'uxuyob tsʌnsʌbil bʌ i majtan tac jini dioste' mach bʌ anic i cuxtʌlel.

²⁹ Tsi' techbeyob i mich'ajel lac Yum yic'ot i melbalob. Tsa' tejchi tsʌts bʌ c'amʌjel tsa' bʌ pam ñumi ti' tojlelob.

³⁰ Pero tsa' bʌx'a Finees ti meloñel. Che' jini tsa' lajmi jini tsʌts bʌ c'amʌjel.

³¹ Tsa' q'uejli ti toj Finees yic'ot i yalobilob ti junjunlajm cha'an tsi' mele jini año' bʌ i mul.

³² Tsi' chʌn cha'leyob mulil israelob. Tsi' techbeyob i mich'ajel Dios ya' ti ja' i c'aba' Meriba. Jini cha'an tsi' yubi wocol Moisés ti' cajob.

³³ Che' bʌ tsi' techbeyob i mich'ajel, tsʌts tsa' caji' yʌ'leñob.

³⁴ Jini israelob tsi' ñusʌbeyob i mandar lac Yum. Ma'anic tsi' jisayob jini sajtemo' bʌ ya' bʌ chumulob.

³⁵ Tsa' tem ajniyob yic'ot jini sajtemo' bʌ. Tsi' ñopbeyob i melbal.

³⁶ Tsi' ch'ujutesayob i dioste' tac sajtemo' bʌ. Jini cha'an tsa' sojquiyob.

³⁷ Tsi' yʌc'ʌyob ti chʌmel ch'iton bʌ yic'ot xch'oc bʌ i yalobilob, Cha'an tsʌnsʌbil bʌ i majtan xibajob.

³⁸ Tsi' bec'beyob i ch'ich'el i yalobilob mach bʌ añobic i mul, ch'itoñob yic'ot xch'ocob, Cha'an mi' yʌq'ueñob tsʌnsʌbil bʌ i majtan jini dioste' tac ti Canaán. Tsi' yʌc'ʌyob ti ts'a'lentel i lumal yic'ot i ch'ich'el i yalobilob.

³⁹ Tsa' sojquiyob che' leco i melbalob. Cabʌlob i mul tsi' cha'leyob ts'i'lel.

⁴⁰ Jini cha'an lac Yum tsi' mich'le i cha'año' bʌ. Tsi' ts'a'leyob.

⁴¹ Tsi' yʌc'ʌyob ti' wenta jini sajtemo' bʌ. Jini israelob tsi' yumayob jini sajtemo' bʌ tsa' bʌ i ts'a'leyob.

⁴² I contrajob tsi' yʌc'ʌyob ti wocol. Wersa tsi' jac'beyob i mandar.

⁴³ Cabʌl tsi' loc'sayob Dios ti' p'ʌtʌlel i contrajob, Pero tsi' chʌn meleyob che' bajche' tsi' bajñel ña'tayob ti' tsʌtslel i pusic'al. Dios tsi' ju'sʌbeyob i pusic'al ti wocol cha'an i jontolil.

⁴⁴ Che' woliyob ti wocol, Dios tsi' p'untayob. Tsi' yubibeyob i yuq'uel.

⁴⁵ Tsi' ña'ta jini xuc'ul bʌ i t'an tsa' bʌ i yʌq'ueyob. Tsi' cʌyʌ i mich'leñob cha'an cabʌl i yutslel.

⁴⁶ Tsi' yʌc'ʌyob ti p'untʌntel cha'an i yumob tsa' bʌ i pʌyʌyob majlel ti cadena tac.

⁴⁷ C Yum lojon Dios, coltañon lojon. Tempañon lojon loq'uel ba' chuculon lojon ti yan tac bʌ lum, Cha'an mic subeñet lojon wocolix a wʌlʌ cha'an ch'ujul a c'aba'. La' ñuc'ac lojon c pusic'al che' mic sub lojon a ñuclel.

⁴⁸ La' ch'ujutesʌntic lac Yum ti pejtelel ora. I Dioset israelob, mach bʌ anic a cajibal mi a jilibal. La' i yʌlob Amén pejtel winicob x'ixicob. ¡Aleluya!