Salmos 104 - Chol: I T’an Dios

Dios uts'at mi' cʌntan i melbal

¹ C Yum, la' c ch'ujutesañet ti pejtelel c pusic'al. C Yum Dios, wen ñuquet. I t'ojol jax a c'uxbintel yic'ot a ñuclel, i wentajʌch a pislel mu' bʌ a lʌp.

² Jini a pislel jiñʌch i c'ʌc'al pañimil. Jini panchan tsʌye'el a cha'an che' bajche' pisil.

³ Ma' wa'chocon a chumlib ti pam jini tocal. Ma' c'ʌn jini tocal i wenta carreta.

⁴ Ma' cha'len xʌmbal ti ic' ya' ti' wich' yilal. Ma' choc majlel ángelob ti a we'tel. P'ʌtʌlob che' bajche' i yʌq'uil c'ajc jini x'e'telob a cha'an.

⁵ Tsa'ix a wa'choco jini pañimil ti' c'ʌclib Cha'an ma'anic mi' yajlel ti pejtelel ora.

⁶ Tsa'ix a moso i jajp lum ti ja' i wentajʌch bujcʌl. Tsa' ñumi ja' ti pam wits.

⁷ Tsi' tʌts'ʌ i bʌ ja' che' bʌ tsa' tiq'ui. Tsa' choco tilel i t'an chajc, tsa' puts'i ja'.

⁸ Tsi' pʌsʌ i bʌ wits. Tsa' tsictiyi tac joctʌl Ya' ti' yajñib ba' wʌn ña'tibil a cha'an.

⁹ Tsa' melbe i cayajon ba' jaxʌl tac lum yic'ot colem ja', cha'an ya' jach mi' yajñel. Mach chʌn mejlix ti pam ñumel ti lum.

¹⁰ Ya' ti joctʌl ma' wʌc' ti loq'uel cuxul bʌ ja'. Mi' cha'len xʌmbal jubel ti' yojlil wits tac.

¹¹ Ya' mi' c'otel i jap jini bʌte'el am bʌ ti mate'el. Ya' mi' lajmesan i tiquin ti' tsiji' bʌ burro.

¹² Jini te'lemut mu' bʌ ti wejlel ñumel mi' mel i c'u' ya' ti' ti' ja'. Ya' ti' ñi' te' mi' t'uchtʌl ti c'ay.

¹³ Jatet chumulet bʌ ti chan ma' mul jini wits. Ma' choc tilel ja'al. Uts'at mi' yʌc' i wut jini lum cha'an a we'tel.

¹⁴ Ma' wʌc' ti pasel jam cha'an i buc'bal wacax. Ma' wʌq'ueñob i ye'tel winicob ti lum Cha'an mic taj lojon i bʌl lojon c ñʌc' ti chajp ti chajp,

¹⁵ Yic'ot vino mu' bʌ i tijicñesʌbeñon lojon c pusic'al, Yic'ot aceite cha'an tijicña lojon c wut, Yic'ot waj cha'an mic taj lojon c p'ʌtʌlel.

¹⁶ Wen on i yetsel jini te' tsa' bʌ a wʌc'ʌ ti colel, c Yum, Che' bajche' jini ch'ujte' tsa' bʌ a pʌc'ʌ ti Líbano wits.

¹⁷ Ya' mi' p'ojlelob te'lemut. Jini c'ubul mi' mel i c'u' ti chʌcajl.

¹⁸ Jini mate'el chivo mi' yajñel ti chan tac bʌ wits. Jini te'lal mi' yajñel ti xajlelol.

¹⁹ Tsa' wʌq'ue i c'ʌjñibal uw cha'an mi' tsictesan jujump'ejl tsic. Jini q'uin mi' bʌjlel che i yorajlelix.

²⁰ Jatet ma' wʌc' ac'ʌlel, mi' yic'an. Che' iq'uix, mi' loq'uel ti xʌmbal pejtel bʌte'el.

²¹ Jini alʌ bajlum mi' cha'len oñel che' an i wi'ñal. Mi' sajcan majlel i bʌl i ñʌc' mu' bʌ a wʌq'uen, Dios.

²² Che' mi' pasel q'uin mi' cha' sujtel ti pʌctʌl ya' ti' ch'eñal.

²³ Jini winicob mi' loq'uelob majlel ti e'tel. Mi' cʌyob i ye'tel che' wolix ti bʌjlel q'uin.

²⁴ C Yum, cabʌl jax a melbal. Ti a ña'tʌbal tsa'ix a mele ti pejtelel. Ti pejtelel pañimil tsiquil jini wen tac bʌ tsa' bʌ a melbeyon lojon.

²⁵ An colem ñajb cabʌl bʌ i ñajtlel. Mach mejlic ti tsijquel i chʌñil tac. Cabʌl i chʌñil, biq'uit bʌ yic'ot colem bʌ.

²⁶ Ya' mi' cha'len xʌmbal jini colem barco. Ya'ʌch an jini leviatán tsa' bʌ a mele cha'an mi' cha'len alas ti ja'.

²⁷ Pejtel i chʌñil pañimil yic'ot i chʌñil colem ñajb mi' pijtañet, Come jatet ma' wʌq'uen i bʌl i ñʌc' ti' yorajlel.

²⁸ Ma' wʌq'uen i tempan i bʌl i ñʌc'. Che' ma' wʌq'uen mi' ñaj'an.

²⁹ Che' ma' mʌy a wut p'ump'un jax i bʌ. Che' ma' chilben i cuxtilel mi' chʌmel. Mi' cha' sujtel ti ts'ubejn.

³⁰ Che' ma' choc tilel a wEspíritu, mi' p'ojlelob yan tac bʌ. Ma' wʌc' ti p'ojlel jini cuxul tac bʌ ti pañimil.

³¹ C Yum, mach jilic a ñuclel ti pejtelel ora. Yom tijicña a pusic'al cha'an a melbal.

³² Ma' q'uel pañimil. Tsilecña mi' ñijcan i bʌ jini lum. Ma' tʌl wits, mi' loq'uel buts'.

³³ Mi caj j c'ʌyiñet, c Yum, ti pejtelel c jabilel. Mi caj j c'ʌyiñet ti salmo tac che' cuxulon to.

³⁴ Yom ma' q'uel ti uts'at chuqui wolic subeñet, Come tijicñayon cha'añet, c Yum.

³⁵ La' jilicob xmulilob ti pañimil. La' junyajlel jilicob jini mu' bʌ i ñusañob Dios. La' c ch'ujutesañet c Yum tic pusic'al. ¡Aleluya!