Salmos 103 - Chol: I T’an Dios

Cabʌl i yutslel i pusic'al Dios

¹ La' c ch'ujutesan c Yum ti pejtelel c pusic'al. La' c ch'ujutesan jini ch'ujul bʌ i c'aba' ti pejtelel c p'ʌtʌlel.

² La' c ch'ujutesan c Yum ti pejtelel c pusic'al. Mach mi' wis ñajʌyel tic pusic'al chuqui mi' yʌq'ueñonla.

³ Jiñʌch mu' bʌ i ñusʌbeñon pejtelel c mul. Mi' lajmesʌbeñon pejtelel j c'amʌjel.

⁴ Mi' mʌñon loq'uel ba' colel c chʌmel. Mi' ch'ʌlon ti corona come c'ux mi' yubiñon.

⁵ Mi' tijicñesañon yic'ot wen tac bʌ c majtan wʌ' ti pañimil cha'an mic cha' p'ʌtan che' bajche' xiye'.

⁶ Lac Yum mi' mel ti toj jini tic'lʌbilo' bʌ. Mi caj i q'uextʌbeñob i mul xjontolilob.

⁷ Tsi' pʌsbe Moisés chuqui woli' ña'tan ti' pusic'al. Tsi' pʌsbeyob israelob i melbal.

⁸ Lac Yum mi' cha'len p'untaya, uts i pusic'al. Jal mi' mich'an. Cabʌl mi' p'untañonla.

⁹ Mach ti pejtelelic ora mi caj i tic'onla. Ma'anic mi' cʌntan i mich'ajel ti pejtelel ora.

¹⁰ Ma'anic tsi' yʌq'ueyonla wocol che' bajche' c'amel an lac mul. Ma'anic tsi' q'uexta lac mul che' bajche' c'amel an.

¹¹ Come cabʌlʌch i yutslel i pusic'al che' bajche' i chanlel panchan Ti' tojlel jini mu' bʌ i bʌc'ñañob.

¹² Che' bajche' i ñajtlel pañimil c'ʌlʌl ti' pasibal q'uin c'ʌlʌl ti' bʌjlibal q'uin, Che'ʌch tsi' chocbeyonla lac mul.

¹³ Che' bajche' winicob mi' c'uxbiñob i yalobilob, Che' ja'el lac Yum mi' p'untan jini mu' bʌ i bʌc'ñañob.

¹⁴ Come yujil c'uñonla, yujil melbilonla ti ts'ubejn.

¹⁵ Poj jumuc' jach cuxulonla che' bajche' jam. Jumuc' jach an lac wenlel che' bajche' i nich pimel.

¹⁶ Che' mi' ñumel ic' mi' yajlel. Mach chʌn tsiquilix.

¹⁷ Pero i yutslel lac Yum ti pejtelel ora an. Lac Yum mi' pʌsbeñob i yutslel yic'ot i tojel jini mu' bʌ i bʌc'ñañob yic'ot i p'olbalob ti lajm ti lajm

¹⁸ Che' bajche' jaytiquil mi' jac'beñob jini xuc'ul bʌ t'an, Mu' bʌ i ña'tañob i mel che' bajche' ts'ijbubil. Mi' pʌsbeñob i yutslel lac Yum.

¹⁹ Lac Yum tsa'ix i wa'choco i yumʌntel ya' ti panchan. Mi' cha'len yumʌntel ti pejtelel pañimil.

²⁰ Ch'ujutesanla lac Yum, ángelob cabʌl bʌ la' p'ʌtʌlel, Mu' bʌ la' jac'ben i t'an, mu' bʌ la' melben chuqui mi' yʌl.

²¹ Ch'ujutesanla lac Yum pejtel i yángelob, X'e'teletla mu' bʌ la' melben chuqui yom Dios.

²² Ch'ujutesan lac Yum pejtelel i melbal, Ti jujump'ejl tejclum ti pejtelel i yumʌntel. La' c ch'ujutesan c Yum ti pejtelel c pusic'al.