Salmos 101 - Chol: I T’an Dios

Uts'at mi caj i yajñel

¹ C Yum, mi caj c cha'len c'ay cha'an uts a pusic'al. Toj a meloñel. Mi caj c cha'len c'ay ti a tojlel, c Yum.

² Com c cha'len xʌmbal che' bajche' a wom. ¿Baqui ora mi caj a tilel a coltañon? Mi caj c mel che' bajche' yom ti' tojlel c pi'ʌlob ti cotot.

³ Mach comic c jac' c pʌyol ti mulil. Ts'a' mij q'uelben i melbal jini xjontolil Ma'anic mi caj c tsajcan.

⁴ Ma'anic mi caj cʌc' c bʌ ti sojquel. Ma'anic mi caj c ñop jontolil.

⁵ Mi caj c tic' jini mu' bʌ i lon jop'ben i mul i pi'ʌl ti chumtʌl. Ma'anic mi caj j cuchben jini mu' bʌ i chañ'esan i bʌ, mu' bʌ i q'uel i bʌ ti ñuc.

⁶ Mic p'is tic wenta pejtel xuc'ulo' bʌ tic lumal. Temel mi yajñelob quic'ot. Jini mu' bʌ i cha'len xʌmbal ti toj bʌ bij mi caj cotsan ti x'e'tel c cha'an.

⁷ Ma'anic mi' caj ti chumtʌl ti cotot jini mu' bʌ i lotin i pi'ʌlob. Ma'anic mi caj i yajñel ba' añon jini mu' bʌ i cha'len lot.

⁸ Mi caj c chʌn tic' jini xjontolilob año' bʌ tic wenta Cha'an mic chocob loq'uel ti' tejclum lac Yum.