Salmos 100 - Chol: I T’an Dios

Yom lac suben Dios wocolix i yʌlʌ

¹ Winicob x'ixicob ti pejtelel pañimil yom tijicña mi la' cha'len t'an ti' tojlel lac Yum.

² Melbenla i ye'tel lac Yum ti' tijicñʌyel la' pusic'al. Cha'lenla c'ay che' mi la' wochel ti' tojlel lac Yum.

³ Ña'tanla Diosʌch jini lac Yum. Jini tsi' meleyonla, i cha'añonla. I winiconla, i tiñʌme'onla mu' bʌ i cʌntan.

⁴ Ochenla ti' ti' tac i yotot lac Yum. Subenla wocolix i yʌlʌ. Subenla i ñuclel che' mi la' c'otel ti' pam i yotot. Subenla wocolix i yʌlʌ. Ch'ujutesanla i c'aba'.

⁵ Come uts'at lac Yum. Mi caj i yajñel i yutslel i pusic'al ti pejtelel ora. Mi caj i pʌsbenob i xuc'tilel i pusic'al la calobilob ti lajm ti lajm.