Proverbios 6 - Chol: I T’an Dios

Mach yomic ts'ubet

¹ Calobil, mi tsa' wʌc'ʌ a c'aba cha'an ma' tojben i bet yambʌ, mi tsa' mele trato yic'ot yambʌ,

² chucbilet che' bajche' ti yac. Cʌchbilet cha'an tsa' wʌc'ʌ a t'an.

³ Calobil, mele che' bajche' wolic subeñet cha'an ma' loq'uel ti libre, come woli' sub a mul a pi'ʌl ti chumtʌl cha'an tsa' wʌc'ʌ a t'an.

⁴ Cucu ti ora. Mele a bʌ a wic'ot a pi'ʌl. Mach a cha'len wʌyel. Mach a wis c'aj a wo jinto mi' yujtel.

⁵ Loq'uen ti' p'ʌtʌlel a pi'ʌl che' bajche' mi' loq'uel me' ti yac, che' bajche' te'lemut mu' bʌ i loq'uel ti' c'ʌb xchucmut.

⁶ Mi ts'ubet, cucu ñopo bajche' mi' mel xiñich'. Ac'ʌ ti a pusic'al chuqui woli' cʌntesañet.

⁷ Ma'anic i yum, ma'anic xq'uel e'tel. Ma'anic mi' subentel bajche' yom mi' mel.

⁸ Pero mi' tempan i bʌl i ñʌc' ti' yorajlel jajmel. Mi' lot ti' yorajlel c'ajbal.

⁹ Jatet ts'ubet bʌ, ¿jayp'ejl to ora wʌyʌlet? ¿Baqui ora mi caj a cʌy wʌyel cha'an ma' ch'ojyel?

¹⁰ Ts'ita' to yom wʌyel. Poj jumuc' to woliyet ti ñʌcʌb. Che' jach ma' jal a c'ʌb yambʌ jumuc' to.

¹¹ Che' jini mux caj i bʌc' jilel a chubʌ'an che' bajche' ti xujch' am bʌ i juloñib. Mux a wochel ti pobre. Mux a taj wocol.

¹² ¿Chuqui i ye'tel winic mu' bʌ i cha'len lot? Jontol jax.

¹³ Mi' mucu pʌy ti mulil i pi'ʌlob. Mi' c'ʌn i yoc i c'ʌb i wut ti maña tac bʌ.

¹⁴ Mi' wʌn ña'tan mulil ti' pusic'al. Ti pejtelel ora mi' tech jontolil.

¹⁵ Jini cha'an mi caj i bʌc' taj wocol. Mi caj i bʌc' jisʌntel. Mach chʌn colix.

¹⁶ Lac Yum mi' ts'a'len pejtel mulil. Añʌch wʌcchajp xmulilob ts'a'le'bilo' bʌ i cha'an, yic'ot yambʌ junchajp:

¹⁷ Jini mu' bʌ i chañ'esan i bʌ, jini mu' bʌ i cha'len lot, jini mu' bʌ i tsʌnsan jini toj bʌ,

¹⁸ jini mu' bʌ i tech mulil ti' pusic'al, jini mu' bʌ i sʌclan majlel jontolil,

¹⁹ jini mu' bʌ i jop' t'an ti meloñel, jini mu' bʌ i t'ox hermanojob ti a'leya. Jiñobʌch ts'a'lebilo' bʌ cha'an lac Yum.

Mach a taj a wixic

²⁰ Calobil, jac'ben i mandar a tat. Mach a ñusʌben i cʌntesʌbal a ña'.

²¹ Chʌn ac'ʌ ti a pusic'al ti pejtelel ora. La' toj'esʌntiquet ti' jac'ol i t'an.

²² Che' ma' cha'len xʌmbal mux i pʌsbeñet baqui yom ma' majlel. Che' ma' ñoltʌl ti wʌyel mux i cʌntañet. Che' ma' ch'ojyel mux a chʌn ña'tan ti a pusic'al.

²³ Come jini mandar a lamparajʌch. Jini a cʌntesʌntel a c'ʌc'alʌch. Jini a tic'ol mi' cʌntesañet bajche' yom ma' wajñel

²⁴ cha'an ma' cʌntan a bʌ ame a ñochtan x'ixic am bʌ i ts'i'lel, ame a jac'ben i lot che' mi' pʌyet ti mulil.

²⁵ Mach a mulan che' i t'ojol jax ma' q'uele'. Mʌyʌ a wut ame a jac' a pʌyol ti mulil che' mi' q'uelet ti' wut.

²⁶ Come jini mu' bʌ i taj i yixic mi' yochel ti pobre. Jini x'ixic mi' chijtan winic cha'an mi' yʌc' ti sajtel.

²⁷ Mi tsa' lac meq'ue c'ajc, ¿mach ba anic mi' pulel lac pislel?

²⁸ Mi tsa' lac t'uchta i ñich c'ajc, ¿mach ba anic mi' pulel la coc?

²⁹ Che' ja'el mux i toj i mul majqui jach mi' pi'len i yijñam yambʌ.

³⁰ Ma'anic mi lac ts'a'len jini xujch' mu' bʌ i xujch'in i bʌl i ñʌc' che' wi'ñayix.

³¹ Pero mi tsa' chujqui, mux i toj wucyajl. Wersa mi' yʌc' pejtel i chubʌ'an cha'an mi' toj.

³² Tonto jini winic mu' bʌ i taj i yixic. Mi' yʌc' i bʌ ti jilel cha'an i ts'i'lel.

³³ Mi caj i bajbentel. Mi caj i cha'len quisin. Mach lajmix i ts'a'lentel ti pejtelel ora.

³⁴ Mich'atax jini winic mu' bʌ i cʌytʌl cha'an i pi'ʌl. Mach muq'uic i p'untan jini am bʌ i mul che' mi' yʌq'uen i toj.

³⁵ Mach muq'uic i yuts'an i pusic'al ti taq'uin. Anquese cabʌl ma' wʌq'uen i majtan mach tijicñayic i pusic'al.