Proverbios 29 - Chol: I T’an Dios

¹ Jini mach bʌ anic mi' ñoj jac' i tic'ol anquese cabʌl mi' tijq'uel mi caj i bʌc' jilel. Ma'anix i ts'ʌcal.

² Che' mi' cha'leñob yumʌntel jini tojo' bʌ, tijicña i pusic'al winicob x'ixicob. Che' mi' cha'leñob yumʌl jini sajtemo' bʌ, wocol jax mi' yubiñob winicob x'ixicob.

³ Jini ch'iton winic mu' bʌ i mulan i cʌntesʌntel mi' ñuq'uesʌben i pusic'al i tat. Jini mu' bʌ i taj i yixic mi' cʌlʌx jisan i chubʌ'an.

⁴ Jini rey mu' bʌ i cha'len toj bʌ meloñel mi' xuc'chocon i yumʌntel. Jini cabʌl bʌ mi' c'ajtin tojoñel yic'ot i majtan taq'uin mi' yotsan ti pobre i lumal.

⁵ Jini mu' bʌ i lotin yambʌ cha'an mi' yʌsan ti mulil woli' yʌq'uen chij ti' yoc yilal.

⁶ Jini xjontolil mi' yajlel ti' mul che' bajche' ti yac. Ma'anic chuqui mi' bʌc'ñan jini toj bʌ. Tijicñayʌch i pusic'al.

⁷ Jini toj bʌ mi' coltan jini p'ump'un bʌ woli bʌ i tic'lʌntel. Jini jontol bʌ ma'anic mi' p'is ti' wenta.

⁸ Jini xwajleyajob mi' xic'ob ti mich'ajel i pi'ʌlob ti tejclum ti mojt ti mojt cha'an mi' contrajiñob i bʌ. Jini año' bʌ i pusic'al mi' lajmesañob leto cha'an mi' cʌyob i mich'ajel.

⁹ Mi tsa' ochi ti meloñel jini am bʌ i pusic'al yic'ot jini tonto bʌ, mach lajmic jini leto mi ti tse'ñalic mi ti mich'ajelic.

¹⁰ Jini stsʌnsajob mi' ts'a'leñob jini toj bʌ. Jini tojo' bʌ mi' ñopob i coltan.

¹¹ Jini tonto bʌ mi' yʌc' ti tsictiyel pejtelel i mich'ajel. Jini wen bʌ i pusic'al che' jach ñʌch'ʌl mi' cʌytʌl.

¹² Mi woli jach i ñop lot jini am bʌ i ye'tel jontolob pejtel i winicob.

¹³ Jini p'ump'un bʌ yic'ot jini mu' bʌ i tic'lan mi' q'uelob i bʌ. Lajal tilem ti Dios i cuxtʌlel.

¹⁴ Xuc'ul mi caj i yajñel ti' buchlib ti pejtelel ora jini rey mu' bʌ i mel ti uts'at jini mach bʌ añobic i chubʌ'an.

¹⁵ Cha'an ti asiyal yic'ot ti tsico' pusic'al mi' julel i pusic'al ch'iton. Jini che' jach bʌ mi' colel mi caj i yʌc' ti quisin i ña'.

¹⁶ Che' mi' wa'chocontelob jini xjontolilob mi' yutsi p'ojlel jontolil. Jini tojo' bʌ mi caj i q'uelbeñob i yujtibal i p'ʌtʌlel.

¹⁷ Aq'uen i tsico' pusic'al a walobil. Che' jini mux i yʌq'ueñet a c'aj a wo. Mux i tijicñesʌbeñet a pusic'al.

¹⁸ Ya' ba' ma'anic sub t'an mi' cha'leñob bajche' jach yomob winicob x'ixicob. Tijicña jini mu' bʌ i jac' mandar.

¹⁹ Mach cojic jach ti t'an mi' julel i pusic'al mozo, che' yujilix chuqui yom i yum pero mach yomic i yʌc' ti' pusic'al.

²⁰ ¿A cʌñʌ ba winic mu' bʌ i bʌc' jʌmtech i t'an che' woli' cʌntesʌntel? Ñumen p'ump'un jax jini winic bajche' jini tonto bʌ.

²¹ Jini mozo che' jach bʌ mi' colel ti' yotot i yum mux i yʌq'uentel i chubʌ'an i yum che' mi' chʌmel.

²² Jini mich' bʌ mi' tech a'leya. Mi' tech cabʌl wocol jini yujil bʌ mich'ajel.

²³ Jini mu' bʌ i chañ'esan i bʌ mi cajel i q'uejlel ti pec'. Jini mu' bʌ i peq'uesan i bʌ mi cajel i q'uejlel ti ñuc.

²⁴ Jini mu' bʌ i coltan xujch' woli' sʌt i bʌ. Che' mi' pʌjyel ba'an am bʌ i ye'tel ma'anic mi' wis sub chuqui mi' ña'tan.

²⁵ Majqui jach mi' bʌc'ñan winicob x'ixicob mach librejic. Chucul ti yac yilal. Jini mu' bʌ i xuc'chocon i bʌ ti lac Yum añʌch i coltʌntel.

²⁶ La com lac tajben i yutslel i pusic'al am bʌ i ye'tel cha'an mi' melonla ti toj, pero jiñʌch lac Yum mu' bʌ i melonla ti jujuntiquilonla.

²⁷ Jini toj bʌ ts'a' mi' q'uel xjontolil. Che' ja'el jini sajtem bʌ ts'a' mi' q'uel jini toj bʌ.