Proverbios 28 - Chol: I T’an Dios

I wenlel jini tojo' bʌ; i mul jini jontolo' bʌ

¹ Jini xjontolil mi' cha'len puts'el anquese ma'anic majch mi' yajñesan. Lajal i ch'ejlel i pusic'al jini tojo' bʌ bajche' bajlum.

² Mi' p'ojlel año' bʌ i ye'tel che' mi' t'oxob i bʌ ti leto winicob x'ixicob. Jini p'ip' bʌ i pusic'al yujil i ñʌch'chocontel leto cha'an mi' jalijel i yumʌntel.

³ Jini pobre mu' bʌ i xujch'iben i chubʌ'an yambʌ pobre lajalʌch bajche' wen ja'al mu' bʌ i wets' majlel lum, mu' bʌ i lu' jisan i bʌl lac ñʌc'.

⁴ Jini xñusa mandarob mi' lon subeñob xjontolilob uts'at añob. Jini mu' bʌ i jac'ob mandar mi' tic'ob.

⁵ Jini jontolo' bʌ ma'anic mi' ch'ʌmbeñob isujm chuqui toj. Jini mu' bʌ i tsajcañob majlel lac Yum mi' lu' ch'ʌmbeñob isujm.

⁶ Jini pobre mu' bʌ i cha'len xʌmbal ti toj bʌ i pusic'al ñumen tijicñayʌch bajche' jini socol bʌ i bijlel mu' bʌ i yotsan i bʌ ti rico.

⁷ Jini ch'iton mu' bʌ i jac' i cʌntesʌntel uts'at mi' q'uejlel ti' tat. Jini mu' bʌ i pi'len majlel jini wo'ob jax bʌ mu' bʌ i jisañob i chubʌ'an mi' yʌc' ti quisin i tat.

⁸ Jini mu' bʌ i yʌc' i taq'uin ti bet, mu' bʌ i c'ajtiben i jol ti uw ti uw cha'an mi' p'ojlesan i chubʌ'an, woli jach i p'ojlesan cha'an mi' yʌq'uen yambʌ winic wen bʌ i pusic'al mu' bʌ caj i p'untan jini pobrejob.

⁹ Jini mach bʌ anic mi' ñoj jac' i cʌntesʌntel mux i ts'a'libentel i yoración ja'el.

¹⁰ Jini mu' bʌ i yʌsan ti mulil jini toj bʌ lajalʌch bajche' jini mu' bʌ i top' lum cha'an mi' yʌc' ti yajlel yambʌ. Ya jach mi' caj ti yajlel ajñel. Jini tojo' bʌ mi caj i yʌq'uentelob chuqui uts'at.

¹¹ Jini rico cabʌlʌch i pusic'al mi' lon ña'tan i bʌ. Jini pobre, p'ip' bʌ i pusic'al, mi caj i tsictesʌben i tontojlel.

¹² Che' mi' wa'chocontelob ti yumʌl jini tojo' bʌ, mi' ñuc'an i pusic'al winicob x'ixicob. Che' mi' wa'chocontelob jini jontolo' bʌ, wersa mi' puts'elob jini tojo' bʌ.

¹³ Ma'anic mi' taj i wenlel jini mu' bʌ i muc i mul. Jini mu' bʌ i sub i mul, mu' bʌ i cʌy i mul, mi caj i p'untʌntel.

¹⁴ Tijicñayob mu' bʌ i bʌc'ñañob lac Yum ti pejtelel ora. Jini mach bʌ yomic i yubiben i t'an mi caj i yubin wocol.

¹⁵ Jini jontol bʌ yumʌl mi' bʌc'tesan p'ump'uño' bʌ che' bajche' mi' bʌc'tesañonla i t'an bajlum yic'ot wi'ñajax bʌ oso.

¹⁶ Jini yumʌl mach bʌ wenic i pusic'al cabʌl mi' tic'lan jini p'ump'uño' bʌ. Jini yumʌl mu' bʌ i mel i ye'tel ti toj mach bʌ anic mi' ch'ʌm i majtan taq'uin mi caj i ñajt'esʌntel i jabilel.

¹⁷ Jini tsa'ix bʌ i cha'le tsʌnsa mi' caj ti puts'el ti pejtelel ora c'ʌlʌl mi' chʌmel. Mi an majch yom i coltan mach i coltan ame laj bʌ añobic i mul.

¹⁸ Jini mu' bʌ i mel chuqui toj mi' caj ti cʌntʌntel ti Dios. Jini cha'p'ejl jax bʌ i pusic'al mu' bʌ i mel jontolil mi' caj ti jilel.

¹⁹ Jasʌl mi' taj i bʌl i ñʌc' jini mu' bʌ i cha'len e'tel ti lum. Mi' yochel ti pobre jini mu' bʌ i tsajcan majlel ts'ubo' bʌ.

²⁰ Jini toj bʌ mi caj i yutsi taj i wenlel, pero jini mu' bʌ i bʌc' otsan i bʌ ti rico mi caj i toj i mul.

²¹ Mach yomic jelchojc mi laj c'uxbin winicob x'ixicob. Tsajʌlonla yom, ame sajticonla cha'an ts'ita' lac chubʌ'an ti pañimil, mi ti' caj jach waj.

²² Jini wo'atax bʌ ti chubʌ'añʌl mi' sebun i bʌ cha'an mi' yochel ti rico. Ma'anic mi' wis ña'tan mi mux caj i cha' ochel ti pobre.

²³ Ñumen mi caj laj c'uxbin jini tsa' bʌ i tiq'uiyonla bajche' jini tsa' bʌ i lotiyonla ti uts bʌ t'an.

²⁴ Jini mu' bʌ i yʌl mach mulilic che' mi' xujch'iben i chubʌ'an i tat i ña', i pi'ʌlʌch jini mu' bʌ i cʌlʌx jisan i chubʌ'an.

²⁵ Jini am bʌ i chʌclel mi' tech a'leya. Jini mu' bʌ i ñop lac Yum mi caj i taj i wenlel.

²⁶ Tonto jini mu' bʌ i bajñel ña'tan xuc'ul i pusic'al. Jini mu' bʌ i mel chuqui uts'at mi' caj ti colel.

²⁷ Jini mu' bʌ i yʌq'uen i chubʌ'an pobrejob ma'anic mi' yochel ti pobre. Jini mach bʌ anic mi' p'isob ti' wenta an i p'ajol ti' tojlel winicob x'ixicob.

²⁸ Che' mi' wa'chocontelob xjontolilob mi' puts'elob winicob. Che' mi' jilelob jontolo' bʌ año' bʌ i ye'tel, mi' p'ojlelob jini tojo' bʌ.