Proverbios 27 - Chol: I T’an Dios

¹ Mach a lon ña'tan chuqui mi caj a mel ijc'ʌl, come mach a wujilic chuqui mi' caj ti ujtel ijc'ʌl.

² La' i sub a ñuclel yambʌ. Mach a wʌlʌc sub a ñuclel jatet. La' i sub yambʌ. Mach yomic ma' sub ti a bajñelil.

³ Alatax xajlel, wen al jini ji', pero ñumen wocol ti cuchol i mich'ajel jini tonto bʌ.

⁴ Jontol jax jini woli bʌ ti mich'ajel. Bʌbʌq'uen ja'el. Pero ñumen wocol ti cuchol jini tsʌytsʌña jax bʌ i pusic'al.

⁵ Jini mu' bʌ i tsictesʌbeñonla lac mul ñumen an i c'ʌjñibal lac cha'an bajche' jini mu' bʌ i c'uxbiñonla ti mucul.

⁶ Mi' c'uxbiñonla jini mu' bʌ i jec'onla ti isujm bʌ t'an. Mi' contrajiñonla jini xlotiya mu' bʌ i ts'ujts'ubeñonla lac wut.

⁷ Jini ñajix bʌ mach yomic i q'uel chab, pero jini am bʌ i wi'ñal tsaj mi' yubin pejtel i bʌl i ñʌc' yic'ot ja'el jini ch'aj bʌ.

⁸ Che' bajche' te'lemut mu' bʌ i ñajt cʌy i c'u', che'ʌch jini winic ñajt bʌ mi' cʌy i yotot.

⁹ Jini aceite yic'ot perfume mi' ñuq'uesʌbeñonla lac pusic'al. Che'ʌch ja'el laj cʌñʌ bʌ mu' bʌ i toj'esañonla ti uts bʌ t'an.

¹⁰ Mach a cʌy a c'uxbin a cʌñʌ bʌ yic'ot jini c'uxbibil bʌ ti a tat. Mach majliquet ti' yotot a wʌscun ñajt bʌ chumul che' an a wocol. Ñumen mi mejlel i coltañet a cʌñʌ bʌ lʌc'ʌl bʌ i chumlib bajche' a wʌscun ñajt bʌ chumul.

¹¹ Yom p'ip' a pusic'al calobil. Ñuq'uesʌbeñon c pusic'al. Che' jini uts'at mi caj i q'uelon jini tsa' bʌ i p'ajayon.

¹² Jini cʌntesʌbil bʌ mi' ña'tan chuqui bʌbʌq'uen mi' yujtel. Mi' chajpan i bʌ. Jini tonto bʌ ma'anic mi' yotsan ti' pusic'al. Muq'uix i toj.

¹³ Chilben i bujc mu' bʌ i yotsan i bʌ i tojben i bet xbeta taq'uin. Ñup'u mi ma'anic tsi' tojbe i bet jini mach bʌ i cʌñʌyic.

¹⁴ Jini mu' bʌ i pejcan i cʌñʌ bʌ ti c'am bʌ t'an che' ac'ʌlel to, lajal i t'an yubil che' bajche' p'ajoñel.

¹⁵ Jini x'ixic woli bʌ ti a'leya lajalʌch bajche' chʌc'chʌc'ña bʌ ja' che' woli ja'al.

¹⁶ Lajalʌch jini x'ixic bajche' ic'. Mi tsa' lac tiq'ui mach i jac'ʌyic i tic'ol. Lajalʌch bajche' aceite lʌmʌl bʌ ti ñoj bʌ laj c'ʌb. Mach mejlic ti mujquel.

¹⁷ Che' bajche' mi laj c'ʌn rima cha'an mi lac jay'esan machit, che' ja'el mi lac sajcan lac pi'ʌlob cha'an mi' ñuc'an lac pusic'al.

¹⁸ Jini mu' bʌ i cʌntan higuerate' mi caj i c'uxben i wut. Jini mu' bʌ i wen cʌntʌben i chubʌ'an i yum mi caj i c'uxbintel.

¹⁹ Che' bajche' mi laj q'uel lac wut ti ja', che' ja'el mi lac cha' q'uel lac bʌ ti lac pi'ʌlob, come junsujm jach lac pusic'al.

²⁰ An cha'chajp mach bʌ yujilic jastiyel: I yajñib chʌmeño' bʌ yic'ot i pusic'al winicob x'ixicob. Pejtel ora anto yom i cha'añob.

²¹ Jini c'ajc mi' tsictesan plata yic'ot oro. Che' ja'el lac pi'ʌlob mi' tsictesʌbeñonla lac pusic'al.

²² Mach loq'uic i p'ajomal jini tonto bʌ mi ti molino mi tsa' tem juch'u yic'ot trigo.

²³ Yom bʌxet a q'uel a wʌlac'. Cha'len wersa cha'an ma' cʌntan a wacax.

²⁴ Come mach ti pejtelelic ora mi' jalijel lac chubʌ'an. Che' ja'el i p'olbal rey laj bʌ i c'aba' ma'anic mi' jalijel ti' buchlib rey ti pejtelel ora.

²⁵ Mi' tiquin jam. Mi' cha' colel i yal. Mi lac tsep. Mi lac tempan ochel ti mal.

²⁶ Jini tiñʌme' mi' yʌq'ueñonla i tsutsel cha'an lac pislel. Jini tat chivo mi' yʌq'ueñonla i tojol jamil.

²⁷ Jini ña' chivo mi' yʌq'ueñonla lech cha'an mi lac jap yic'ot lac pi'ʌlob año' bʌ ti la cotot yic'ot x'e'telob lac cha'an.