Proverbios 26 - Chol: I T’an Dios

¹ Che' bajche' i ña'al tsʌñal ti' yorajlel ticwal, che' bajche' ja'al ti' yorajlel jajmel, che'ʌch ja'el jini tonto bʌ am bʌ ñuc bʌ i ye'tel.

² Jini xpuruwoc yic'ot x'ajlum che' jach mi' wejlel ñumel che' ma'anic mi' taj i t'uchlib. Che' ja'el i t'an xp'ajoñel ñumel jach mi' majlel. Ma'anic chuqui mi' tumbeñonla che' ma'anic lac mul.

³ Laj an i c'ʌjñibal: Jini chicote cha'an caballo, jini freno cha'an i yej burro, jini asiyal cha'an i pat tonto bʌ.

⁴ Che' mi' pejcañonla ti tonto jini tonto bʌ, mach yomic mi lac jac' ti tonto ame junlajalonicla yilal.

⁵ Che' mi' pejcañonla ti tonto jini tonto bʌ, lajal yom mi lac jac' ame p'ip'ic mi' lon q'uel i bʌ.

⁶ Jini mu' bʌ i choc majlel t'an ti' wenta jini tonto bʌ mi' yʌc' i bʌ ti asintel. Woli' tsep loq'uel i yoc yubil come mach c'otic i t'an.

⁷ ¿Chuqui i ye'tel i yoc jini mach bʌ mejlic ti xʌmbal? Lolom ja'el i subal jini año' bʌ i pusic'al che' mi' cha' subob jini tontojo' bʌ.

⁸ ¿Chuqui i ye'tel a pʌrʌntun mi tsa' cʌchbe i xajlelal? Che' ja'el ma'anic i c'ʌjñibal tonto bʌ mi tsa' wa'choco ti ñuc bʌ i ye'tel.

⁹ Bʌbʌq'uen mi' lowonla ic'ch'ix che' ch'ʌnch'ʌña jax mi' ñijcan xyʌc'ʌjel. Lajal an i p'ʌtʌlel ti jisaya jini tonto bʌ che' mi' cha' al i subal jini año' bʌ i pusic'al.

¹⁰ Ma'anic i pusic'al jini yumʌlob mu' bʌ i pʌyob tilel ti e'tel tontojo' bʌ yic'ot jini ñaxan to bʌ mi' tilelob mach bʌ i cʌñʌyobic. Lajalob bajche' jini xjalʌjb mu' bʌ i lu' jul.

¹¹ Lajal jini tonto bʌ bajche' ts'i'. Che' bajche' mi' cha' sujtel ts'i' cha'an mi' mʌc' i xej che'ʌch mi' sujtel jini tonto bʌ cha'an mi' cha' mel i tontojlel.

¹² ¿A cʌñʌ ba winic mu' bʌ i lon q'uel i bʌ ti ñuc? Mi' lon al ts'ʌcʌlix i ña'tʌbal. Ñumen an i ye'tel tonto bʌ bajche' jini winic.

¹³ Jini ts'u' bʌ mi' yʌl: Mach loq'uicon ti e'tel come ya'an bajlum ya'ya'i. Tic'ʌl mi talix ti bij, lon che'en.

¹⁴ Lajalʌch jini ts'u' bʌ bajche' puerta. Che' bajche' welecña mi' majlel puerta chucul bʌ ti' ti' otot che'ʌch ja'el jini ts'u' bʌ ya jach ñolocña ti' wʌyib.

¹⁵ Jini ts'u' bʌ mi' yotsan i c'ʌb ti ch'ejew. Mi' lujb'an i cha' letsan ti' yej yilal.

¹⁶ Mi' lon ña'tan ñumen an i ña'tʌbal bajche' wuctiquil yujilo' bʌ toj'esa t'an.

¹⁷ Jini mu' bʌ i xʌb otsan i bʌ ba' woliyob ti leto lajalʌch bajche' winic mu' bʌ i chucben i chiquin ts'i' che' mach i cha'anic.

¹⁸ Sojquem i jol yilal jini mu' bʌ i yʌlol choc xutunte' woli bʌ ti lejmel. Che'ʌch ja'el jini ch'ʌnch'ʌña jax bʌ mi' choc majlel sʌp yujil bʌ tsʌnsa.

¹⁹ Lajal ja'el jini winic mu' bʌ i lotin i pi'ʌl. Ti wi'il mi' suben: Cʌxtʌ tsa'ic c cha'le lot. Alas jach, mi' lon al.

²⁰ Mi' yajpel c'ajc che' ma'anix si'. Mi' lajmel a'leya che' ma'anix xjop't'an.

²¹ Jini yujil bʌ a'leya lajalʌch bajche' abʌc yic'ot si' mu' bʌ i chuc c'ajc. Jini yujil bʌ a'leya mi' chʌq'uesan majlel a'leya.

²² Lajalʌch i t'an jini x'uyaj bajche' sumuc bʌ i bʌl lac ñʌc'. C'ʌlʌl ti lac pusic'al mi' c'otel.

²³ Jini xlotiya lajalʌch bajche' uc'um ch'ʌlbil ti' p'ajomal plata. Uts i t'an yilal pero ya' mucul ti' pusic'al an jontolil.

²⁴ Jini mu' bʌ i mucul ts'a'leñonla uts mi' pejcañonla, pero ya' ti' pusic'al mi' p'ol lot.

²⁵ Che' mi' pejcañet ti uts bʌ t'an mach a ñop come leco i pensar.

²⁶ Anquese utsʌch i t'an mu' bʌ i mucul ts'a'leñet, mi caj i tsictesʌntel i mul ti' tojlel jini mu' bʌ i tempañob i bʌ.

²⁷ Jini mu' bʌ i japun lum cha'an mi' yʌc' ti yajlel i pi'ʌlob mi' caj ti yajlel ya'i. Jini mu' bʌ i woxq'uin xajlel mi' caj ti lojwel ti xajlel.

²⁸ Lajalʌch bajche' veneno jini u'yaj t'an. Cabʌl mi' p'ol wocol. Jini mu' bʌ i cha'len lotiya mi' caj ti com'esʌntel i jabilel.