Proverbios 25 - Chol: I T’an Dios

Yambʌ laj cʌntesʌntel

¹ Jiñʌch ja'el i subal Salomón tsa' bʌ i ts'ijbayob i winicob Ezequías jini rey ti Judá.

² Tsiquil ñucʌch Dios come anto cabʌl mucul tac bʌ i cha'an. Tsiquil ñucʌch rey che' mi' tsictesan jini mucul tac bʌ.

³ Junlajal mach cʌmbilic lac cha'an i chanlel panchan yic'ot i tamlel lum yic'ot i pusic'al reyob.

⁴ Loc'sʌben i bi'bi'al plata. Che' jini puro plata mi' cʌytʌl cha'an jini xmel taq'uin.

⁵ Tʌts'ʌ loq'uel jini jontolo' bʌ ti' tojlel rey. Che' jini xuc'ul mi caj i yajñel ti' buchlib che' toj mi' cha'len meloñel.

⁶ Mach a chañ'esan a bʌ ti' tojlel jini rey. Mach ma' wotsan a bʌ ba' buchulob jini ñuco' bʌ.

⁷ Uts'at mi tsa' subentiyet buchtʌl ya'i. Quisintic jax mi tsa' subentiyet loq'uel ti' tojlel i yalobil rey che' bʌ tsa'ix ochi a q'uel.

⁸ Mach ma' bʌc' sub ti jamʌl i mul a pi'ʌl ti chumtʌl. Che' jini ¿bajche' mi caj a mel ti wi'il mi tsi' tsictesayet ti melobʌjʌl?

⁹ Mele a bʌ yic'ot a cʌñʌ bʌ. Mach ma' cha' sub chuqui tac mi' subeñet ti mucul

¹⁰ ame i yʌq'uet ti quisin mu' bʌ i yubin a t'an, ame a taj a ts'a'lentel mach bʌ yujilix lajmel.

¹¹ Lajalʌch jini wen albil bʌ t'an bajche' i t'ojol jax bʌ manzana melbil bʌ ti oro, am bʌ i ts'ijbal melbil bʌ ti plata.

¹² Jini wen bʌ i pusic'al mi' jac' i tic'ol. Che' bajche' uya'ʌl yic'ot ujʌl che'ʌch yilal jini xtic'oñel ti' tojlel jini mu' bʌ i jac'.

¹³ Che' bajche' tsʌñal ti' yorajlel ticwal che'ʌch yilal jini wen bʌ x'ac'jun ti' wut jini mu' bʌ i choc majlel. Mi' ñuq'uesʌben i pusic'al i yum.

¹⁴ Che' bajche' tocal yic'ot ic' mach bʌ muq'uic i yʌc' ja'al, che'ʌch yilal jini winic mu' bʌ i lon subeñonla mi caj i yʌq'ueñonla lac majtan.

¹⁵ Jini jal bʌ mi' pijtan i jac'ol ti' yalobil rey woli' yuts'esʌben i pusic'al. Mi' mʌjlel i cha'an mu' bʌ i pejcan ti uts bʌ t'an.

¹⁶ ¿Tsa' ba a taja chab? Cʌyʌ a mʌc' che' jasʌlet ame muq'uic a xejtan mi ch'ʌnch'ʌña jax tsa' mʌc'ʌ.

¹⁷ Mach ma' jalijel ti' yotot a pi'ʌl ti chumtʌl, ame lujb'ac i q'uelet ame caj i ts'a'leñet.

¹⁸ Laj yujil i lowonla: martillo yic'ot cuchillo yic'ot i lanzajlel jalʌjb jay bʌ i ñi', yic'ot winic mu' bʌ i jop' t'an ti' contra i pi'ʌlob ti chumtʌl.

¹⁹ Lajal i c'uxel jini xujlem bʌ i bʌquel la quej, yic'ot jejlem bʌ i p'aquel la coc, che' bajche' jini mach bʌ xuc'ulic che' ti' yorajlel wocol mi tsa' lac xuc'choco lac bʌ yic'ot.

²⁰ Che' bajche' jini mu' bʌ i joch i bujc ti' yorajlel tsʌñal yic'ot jini mu' bʌ i yotsan vinagre ti' lojwel, che'ʌch yilal jini mu' bʌ i cha'len c'ay che' ch'ijiyem i pi'ʌl.

²¹ Mi woli ti wi'ñal jini mu' bʌ i ts'a'leñet, aq'uen i c'ux waj. Mi an i tiquin ti' aq'uen i jap ja'.

²² Che' jini mux caj a wuts'esʌben i pusic'al. Lac Yum mi caj i tojbeñet.

²³ Mi' cajel ja'al che' ch'oyol ic' ti norte. Mi' caj ti mich'ajel jini mu' bʌ i yu'yajintel.

²⁴ Mach tijicñayic winic am bʌ i pi'ʌl woli bʌ ti a'leya anquese colem i yotot. Tijicña aja muq'uic mejl i ñajti tʌts' i bʌ anquese ti' xujc jach jump'ej i mal otot.

²⁵ Tijicña mi la cubin tsʌwan ja' che' an lac tiquin ti'. Tijicña mi la cubin jini wen bʌ t'an ch'oyol bʌ ti ñajtʌl.

²⁶ Mi' caj ti ts'a'lentel jini toj bʌ mi tsi' taja i mul ti' tojlel xjontolilob. Lajalʌch yilal bajche' i loq'uib ja' mach bʌ anix i c'ʌjñibal tsa' bʌ i t'umu chitam.

²⁷ Mach i t'ojolic mi wo'onla ti chab. Mach i t'ojolic ja'el mi woli lac bajñel sub lac bʌ ti ñuc.

²⁸ Mi mach mejlic lac tic' lac bʌ lajalonla bajche' jejmenix bʌ tejclum mach bʌ anic i ts'ajquil ti' joytilel.